ନିର୍ବାଣ

ସ୍ଵପ୍ନର ଇମାରତ ଭାଙ୍ଗିଗଲା ପରେ

ଆଜି ମୁଁ ନିଃସଙ୍ଗ ରିକ୍ତ ହସ୍ତ

ମନ ମୋର ବିଚଳିତ ବିବ୍ରତ ବିରକ୍ତ

ଠିଆ ହୋଇ ତନ୍ଦ୍ରା ନଦୀ ତୀରେ

ଭାଳେ କି ଲକ୍ଷ୍ୟ ମୋ ଛାର ଜୀବନର ।

ବ୍ଯାଧି ଜରା ମୃତ୍ୟୁ ପରାଭବ ଡରେ

ମୁଁ ଭ୍ରମେ ଇତସ୍ତତଃ ପ୍ରମତ୍ତ ଭ୍ରମର ପ୍ରାୟେ

ମଠ ମନ୍ଦିର ମସଜିଦ୍ ଗୀର୍ଜା ଗୁରୁଦ୍ୱାର

ନେତ୍ରେ ଭରି ଦୁଃଖ ଅଶ୍ରୁ ଜଳ

କରେ ପ୍ରଣିପାତ ଅବା ଚଢାଏ ଚାଦର ।

କ୍ଷଣିକରେ ମନ ପ୍ରାଣ ହୁଏ ପୁଲକିତ

ଅନୁଭବେ ସର୍ବତ୍ର ଏକ ସ୍ବର ଗୁଞ୍ଜରିତ

କାମନାର ବିନାଶରେ ଦୁଃଖର ବିନାଶ

ଦୁଃଖର ବିନାଶରେ ସର୍ବ ସିଦ୍ଧି ପ୍ରାପ୍ତ ।

ଲୋଡା ନାହିଁ ଆଜି ଆଉ ମୋର

ଧନ ଜନ କାମ ଆଦି ତୁଛ ପଦାର୍ଥ

ମନ ଧ୍ଯାନେ କର୍ଣ୍ଣେ ମୁକ୍ତି ମାର୍ଗ ଉନ୍ମୋଚିତ

ହୃଦୟ କନ୍ଦରେ ବିରାଜିତ ପ୍ରଭୁ ତଥାଗତ ।

ବର୍ଜି ସର୍ବ ଭୋଗ ବିଳାସ ବାସନା

ଅଙ୍ଗେ ଧରି ଗୌରିକ ବସନ

ସାଜିବି ସାଜିବି ମୁଁ ଆଜି ଶ୍ରମଣ

ମୋ ମାର୍ଗ ଚାହିଁ ରହିରହିଛି ନିର୍ବାଣ ।