ନୀଳାଚଳେ ଶ୍ରୀଜଗନ୍ନାଥ

କୋଟି ଭକତର ଗୋଟିଏ ଦିଅଁ ତୁ

ନୀଳ କନ୍ଦରରେ ନିବାସ ତୋର

ଘରଣୀ ତୋହର ଲକ୍ଷ୍ମୀ ଠାକୁରାଣୀ

ଦୀନ ଦୁଃଖୀ ଜନେ କରେ ଆଦର I

ରତ୍ନ ସିଂହାସନେ ବସି ଖୁସି ମନେ

ସଭିଙ୍କ ବିଚାର କରୁଛୁ ତୁହି

ହେ କରୁଣାକର ତୋ ଦରବାରରେ

ବଡ ସାନ କିଛି ବିଭେଦ ନାହିଁ I

ଆନନ୍ଦବଜାରେ ବ୍ରାହ୍ମଣ ଚାଣ୍ଡାଳ

ଅବଢା ଖାଆନ୍ତି ଏକାଠି ବସି

ଟଙ୍କ ତୋରାଣିରୁ ଢୋକେ ପିଇଦେଲେ

ଭରିଯାଏ ମନେ ଅପୂର୍ବ ଖୁସି I

ବଡଦାଣ୍ଡେ ତୋର ଗହଳି ଚହଳି

ଲାଗି ରହିଥାଏ ବରଷ ସାରା

ଭକତ ବତ୍ସଳ କାଳିଆ ଠାକୁର

ଭକତ ତୋହର ଜୀବନ ଧାରା I

ତୋ ଦର୍ଶନ କଲେ ମନ ତୋଷ ହୁଏ

ଚକା ଚକା ଆଖି ଅଧର ନାଲି

ମରଣ ବେଳାରେ ତୋର ନାମ ନେଲେ

ସରଗ ଦୁଆର ଦେଉ ତୁ ଖୋଲି I

ଜଗତର ନାଥ କାଳିଆ ସାଆନ୍ତ

ତୋ ନାମେ ଚାଲୁଛି ନିଶ୍ୱାସ ମୋର

ଅନ୍ତିମ କ୍ଷଣରେ ଦରଶନ ଦେଇ

ଖୋଲିବୁ ମୋପାଇଁ ମୁକତି ଦ୍ୱାର I