ନିଃସଙ୍ଗତା
ନିଃସଙ୍ଗତା
ନିରୋଳା ଅନୁଭବକୁ ମୋର
ବହୁତ ଥର ଆଙ୍କିବାକୁ ଚେଷ୍ଟା କରିଛି,
କେତେ ଯେ ରଫ୍ ଖାତା ତା'ର ସାକ୍ଷୀ ଅଛି,
ଆଜି କିନ୍ତୁ ଏ ନିଃସଙ୍ଗତା
କାରାବାସ ପରି ବୋଧ ହେଉଛି।
ମରୁଭୂମିରେ ମରୀଚିକା ପରି
ଲୁଚକାଳି ଖେଳୁଛନ୍ତି ଶବ୍ଦ ସବୁ,
ପ୍ରହେଳିକା ପରି ବିଦାରି ଚାଲିଛନ୍ତି,
ଗୋଟିଏ ପ୍ରଶ୍ନର ଉତ୍ତର ପାଇବାକୁ।
ମୁଁ କ'ଣ ସତରେ ନିଃସଙ୍ଗ ?
ସମ୍ପର୍କର ମୂଲ୍ୟ ନିର୍ଦ୍ଧାରଣ କରି,
ଛାଡ଼ି ଚାଲି ଯାଇଥିବା,
ସେଇ ସ୍ୱାର୍ଥପର ଆତ୍ମୀୟସ୍ବଜନ ମାନେ,
ସତରେ କ'ଣ ଅକ୍ଷମ ?
ମୋ ନିଃସଙ୍ଗତାର ଧ୍ୱନି ଶୁଣିବାକୁ?
ନା ଏଠି ଖାଲି ସ୍ୱାର୍ଥ ପାଇଁ
ସମ୍ପର୍କରେ ଜୁଆର ଭଟ୍ଟାର ଅବସ୍ଥିତି।
ଅନ୍ତରଙ୍ଗ ତ କେବଳ ନିଃସଙ୍ଗତା
ନିଜକୁ ଅତି ନିକଟରୁ ଜାଣିବାର ଜିଜ୍ଞାସା
ଆଉ ସେଇ ଜିଜ୍ଞାସାର ପ୍ରଥମ ସୋପାନ,
ଅପ୍ରିୟ ସତ୍ୟର ସାଥିରେ ଜୀବନ ଜିଇଁ
ନିଃସଙ୍ଗତାର ଧ୍ୱନିରେ ନିଜକୁ ହଜାଇଦେବା।