ନିବୃତ୍ତି
ନିବୃତ୍ତି
ହୋଇ ସାରିଅଛି ସେବାରୁ ନିବୃତ୍ତି
ପ୍ରବୃତ୍ତି ମୁକ୍ତ ସ୍ୱଚ୍ଛନ୍ଦ
ସମୟର ନାହିଁ ଆକଟ ପ୍ରବନ୍ଧ
ସଂସାର ବାଧା ବନ୍ଧନ ।
ସମାଜ କଲ୍ୟାଣ ସାରସ୍ୱତ ସତ୍ୟ
କାବ୍ୟ ସାହିତ୍ୟ ସୁନ୍ଦର
ସୃଷ୍ଟି ସମନ୍ୱୟ ମଙ୍ଗଳ ସାଧନ
ଜୀବନର ବ୍ରତ ମୋର ।
ବିଶ୍ଵ ନିୟନ୍ତାଙ୍କ ମହାନ ସଦିଚ୍ଛା
ସୃଜନ ପାଳନ କର୍ମେ
ନଇଁ ଯାଉ ମଥା ଶ୍ରୀପଦ ପଙ୍କଜେ
ସବୁଜ ଶ୍ୟାମଳ ଧର୍ମେ ।
ଈଶ୍ୱରଙ୍କ ଘର ପବିତ୍ର ମଧୁର
ଏ ସଂସାର ଶ୍ରୀମନ୍ଦିର
ପ୍ରବହୁ ପ୍ରଶାନ୍ତି ଜୀବନ ତଟିନୀ
ସନ୍ନିଧ୍ୟୁ ନୀଳ ସାଗର ।
ପ୍ରେମ ସହଯୋଗ ବିଶ୍ୱାସ ସମ୍ମାନ
ସୁରକ୍ଷା ସହାନୁଭୂତି
ହେଉ ଏକନିଷ୍ଠ ସମ୍ବନ୍ଧ ସମ୍ପର୍କ
ଲଭୁ ପରାଣ ମୁକତି ।
ପ୍ରଜ୍ଜ୍ୱଳୁ ଜୀବନ ଅଖଣ୍ଡ ପ୍ରଦୀପ
ନାଶ ହେଉ ଅନ୍ଧକାର
ଦିଅ ପ୍ରଭୁ ଶକ୍ତି ଟଳୁ ଦୁଃଖ କଷ୍ଟ
ସଙ୍କଟ ହେଉ ଦୂର ।