ନବକଳେବର
ନବକଳେବର
ତରୁଣ ଅରୁଣର କରୁଣ ଆଭାରେ
ପୁଲକିତ ଧରାପୃଷ୍ଠ-ସୁରଭିତ ପରିବେଶ
ତନ୍ମଧ୍ୟରେ ଏକ ପର୍ଯ୍ୟାୟ ପତିତ କଂକାଳର
ନବକଳେବର କାର୍ଯ୍ୟ ସମାପନ ହୋଇଛି
ପ୍ରକୃତି ଓ ପୁରୁଷର ବହୁବ୍ରୀହି ମିଳନରେ
ନାନୀ ମାଁ ର ଶୋକରେ-ଦାଦନର ଭୋକରେ
ଧୂମିଳ ସ୍ଵପ୍ନର ଦୁଃଖରେ-ଧୂସରିତ ଦିଗଂତର ଲକ୍ଷ୍ୟରେ
ଦାରିଦ୍ର୍ୟ ଭବ୍ୟ ରୂପରେଖରେ- ଦୈନ୍ୟର ଅନିର୍ଦ୍ଦିଷ୍ଟ ଅଧ୍ୟାୟରେ
ଶ୍ରେଣୀ ବୈଷମ୍ୟର ଅସରଂତି ଅବୋଲକରା କାହାଣୀରେ
ବ୍ରହ୍ମ ବିଭ୍ରାଟର ଅକଳ୍ପନୀୟ ପୃଷ୍ଠଭୂମିରେ
ନବକଳେବର ସଂପାଦି ହେବ :
ମୌସୁମୀ ମନସ୍କା ପ୍ରକୃତିର ଯଥାର୍ଥ ଅଭିଗ୍ରହଣରେ
ମୌସୁମୀସି ପ୍ରିୟାର ଗୋଲାପୀ ପଣତକାନିରେ
ସବୁଜ ଅରଣ୍ୟ ଓ ନୀଳଜହ୍ନର ମିଶ୍ରିତ ଅନୁକୃତିରେ
ଶୁଦ୍ଧ ସମାଜ ଓ ସୁସ୍ଥ ପରିବେଶର ସାର୍ଥକ ସ୍ବପ୍ନରେ
ସର୍ବୋପରି :
ସୁରମ୍ୟ ସଂପର୍କର ଶ୍ରାବଣୀ ସୃଜନଶୀଳତାରେ ।