"ନାତୁଣୀ ମୋ ଗୋଟେ ହୀରା"
"ନାତୁଣୀ ମୋ ଗୋଟେ ହୀରା"
ବାର୍ଷିକ ପରୀକ୍ଷା ସରିଗଲା ପରେ
କହିଲି ମୁଁ ଦିନେ ଘରେ ,
"ଏଥରକ ମୁହିଁ ଚାକିରି କରିବି
ହଁ କହିଦିଅ ଥରେ "
ମାଆ କହିଲା-"ତୁ ଏଡ଼ୁଟିଏ ପିଲା
କେ-ଚାକିରି ଦେବ ତୋତେ ,
ପାଠଶାଠ ପଢ଼ି ବଡ଼ହେଲା ପରେ
ଆପେ ମିଳିଯିବ କେତେ "
"ଏବେ କରିବି ମୁଁ ,ଏବେ କରିବି ମୁଁ
ଚାକିରି ଗୋଟାଏ ଦିଅ ,
ନୋହିଲେ କାଲିଠୁ ଖାଇବିନି ଜମା
ଖରାପ ହେଲେ ବି ଦେହ "
କଥାଶୁଣି ମୋର ଜେଜେବାପା ହସି
ଆଉଁଶି ଦେଲେ ମୋ ମଥା ,
କହିଲେ-"ତୁ ଯଦି ଚାକିରି କରିବୁ
ଇଏ ଭାରି ଭଲ କଥା
କାଲି ଠାରୁ ତୋତେ ଚାକିରିଟେ ଦେବି
ଏବେ ନିଶ୍ଚିନ୍ତରେ ଯାଆ ,
ମାଆ ତିଆରିଛି ବିରି ଚକୁଳି ପା'
ମନଭରି ତୋର ଖାଆ "
ପରଦିନ ମୁହିଁ ସଅଳ ଉଠିକି
ନିତ୍ୟକର୍ମ ଦେଲି ସାରି ,
ଜେଜେଙ୍କ ଆଗରେ ହାଜର ହୋଇଲି
କରିବା ପାଇଁ ଚାକିରି
ଜଳଖିଆ ଜେଜେ ଖାଇସାରି ମୋତେ
ବଗିଚାକୁ ନେଲେ ଡାକି ,
କହିଲେ-"ମୁଁ ଯାହା କହୁଛି କରିବୁ
କାମ ରଖିବୁନି ବାକି "
ଜେଜେ ଉପାଡ଼ିଲେ ଗଛମୂଳୁ ଘାସ
ଜମା କଲି ମୁହିଁ ଆଣି ,
ସାନ ବଡ଼ କେତେ ପ୍ରକାର ଗଛରେ
ମିଶି ଦେଲୁ ଦୁହେଁ ପାଣି
କେତେ ନୂଆ ଗଛ ଚିହ୍ନାଇଲେ ଜେଜେ
ଶୁଣିକି ଲାଗିଲା ଖୁସି ,
ସେଦିନୁ ଦି'ଓଳି କାମ କରିଲି ମୁଁ
ତାଙ୍କରି ସହିତ ମିଶି
ବରଷା ଦିନକୁ ଲଗାଇବା ଲାଗି
ସଜାଇଲୁ କେତେ ଚାରା ,
"ଜେଜେଙ୍କଠି ଏବେ ଚାକିରି କରୁଛି"
ଜଣାଇଲି ଗାଆଁ ସାରା
ମୋ କାମରେ ଭାରି ଖୁସିହୋଇ ଜେଜେ
ରାତିକୁ ଶୁଣାନ୍ତି ଗପ ,
ମୋ ସହ ଶୁଣନ୍ତି ସାନଭାଇ ଦୁହେଁ
ହୋଇ ପୂରା ଚୁପଚାପ
ଦିନକୁଦିନ ମୁଁ ପ୍ରକୃତି ସହିତ
ଘନିଷ୍ଠ ହୋଇବା ଦେଖି ,
ବାପା ଆଣିଦେଲେ ପୁରସ୍କାର ଭାବେ
ବହିଟିଏ ମନଲାଖି
"ଆମ ପରିବେଶ ଆମ ହାତରେ" ସେ
ବହିଟିର ପୂରା ନାମ ,
ସୁନ୍ଦର ପ୍ରଚ୍ଛଦ ସହ ରହିଥିଲା
ସୁହାଇଲା ଭଳି ଦାମ
ଭିତରେ କେତେ ଯେ ଶିକ୍ଷଣୀୟ କଥା
ପଢ଼ିଲି ମୁଁ ମନଦେଇ ,
ଜେଜେଙ୍କ ସହିତ କାମେ ଲଗାଇଲୁ
ସୁସ୍ଥ ପରିବେଶ ପାଇଁ
ଚାକିରିଟା ମୋର ସ୍ଥାୟୀ ହୋଇଗଲା
ହେଉ ଶୀତ ,ବର୍ଷା, ଖରା ,
ଖୁସିରେ ସଭିଙ୍କୁ କହିଲେ ତ ଜେଜେ
"ନାତୁଣୀ ମୋ ଗୋଟେ ହୀରା "