Library
ନାସ୍ତିକ
ନାସ୍ତିକ
ମୁଁ ଜଣେ ନାସ୍ତିକ ଈଶ୍ୱର ଅସ୍ତିତ୍ୱ
କରେ ନାହିଁ ସ୍ୱୀକାର
ନ ଯାଏ ମନ୍ଦିର ନ ପୂଜେ ପଥର
ନ ମାଡ଼େ ମଠର ଦ୍ୱାର |
ଗୀତା ଭାଗବତ ପୁରାଣ ପ୍ରଦତ୍ତ
ଉପଦେଶ ଶୁଣେ ନାହିଁ
ପ୍ରବଚକ ମାନ୍ୟ ପ୍ରବଚନମାନ
ବିଷବୋଧ ହୋଇଥାଇ |
ମହା ଗୀତା ଯଜ୍ଞ ବିଶ୍ଵଶାନ୍ତି ଯଜ୍ଞ
ଶୁଣିଲେ ଡ଼ିଏଁ ମୋ ନାହି
ଦେଵାଦେବୀଙ୍କର ମୂର୍ତ୍ତି ସମୀପର
ମୁଣ୍ଡିଆ ମୁଁ ମାରେ ନାହିଁ |
ବିଦ୍ୟାଆଳୟରେ କି ଅନୁଷ୍ଠାନରେ
ଗଣେଶ ବାଣୀ ପୂଜାରେ
ପୁଷ୍ପାଞ୍ଜଳି କାହିଁ ଦିନେ ଦେଇ ନାହିଁ
ପୂଜିନି ଭକ୍ତି ଉର୍ଜାରେ |
ବ୍ରତ ଉପବାସ ନକରେ ବିଶ୍ୱାସ
ଆମିଷ ନିତ୍ୟ ଭୋଜନ
ଅଷ୍ଟପ୍ରହରର ନାମ ଯଜ୍ଞ ହେଲେ
କରେ ମୁଁ ଆତ୍ମଗୋପନ |
ପିତୃ ଶ୍ରାଦ୍ଧ କର୍ମ ଗ୍ରହ ଶାନ୍ତି ହୋମ
ମୋ ପାଇଁ କି ମିଥ୍ୟା ଗପ
ମେଳା ମହୋତ୍ସବ କି ଧର୍ମୀୟ ପର୍ବ
ମାନେ ନାହିଁ ଜପ ତପ |
ଭଣ୍ଡ ଧର୍ମଧ୍ଵଜୀ ବୈରାଗୀ ବାବାଜୀ
ପାଖ ମୁହିଁ ମାଡ଼େ ନାହିଁ
ହେତୁବାଦୀତାରେ ବିଜ୍ଞାନ ଆଧାରେ
ସତ୍ୟାସତ୍ୟ ବୁଝିଥାଇ |
କେଉଁ କଥାକୁ ହିଁ ଅନ୍ଧ ଭାବେ ମୁହିଁ
ଗ୍ରହଣ କରିନଥାଏ
ଭାବ ପ୍ରବଣତା ଭୂତ ପ୍ରେତ କଥା
ଶୁଣୁ ଶୁଣୁ ଚିଡ଼ିଯାଏ |
ପୂଜା ପାର୍ବଣରେ ଚାନ୍ଦା ଆଦାୟରେ
କରିଥାଏ ଯୁକ୍ତିତର୍କ
ଚିତା ଚଇତନ ଗୈରିକ ଭୂଷଣ
ମୋ ବିଚାରେ ଧର୍ମବକ |
ବିଶ୍ୱାସ କର୍ମରେ ରଖେ ନିରନ୍ତରେ
କଠୋରତା ଥାଏ ବରି
ଅନ୍ଧାନୁସରଣ କୁସଂସ୍କାରମାନ
ଦୂର କରେ ଚେଷ୍ଟା କରି |
ମାନବର ସେବା ମାଧବର ପୂଜା
ମରମ ବୁଝିଛି ଯେଣୁ
ଅସହାୟ ଦୁସ୍ଥ ସେବାରେ ପ୍ରବୃତ୍ତ
କରିଛି ନିଜକୁ ତେଣୁ |
