ନାରୀ

ହଁ, ଅନିଚ୍ଛା ସତ୍ତ୍ୱେବି

ନିଜକୁ ବାରମ୍ବାର ଅନାବରଣ କରୁଥାଏ

କେବେ ରଣହୁଙ୍କାର ତ

କେବେ କରୁଣ ଆବେଦନରେ,

କାରଣ ମୁଁ ନାରୀ !

ଯେତେଥର ବିବସ୍ତ୍ରା ହେଉଥାଏ,

ସେତେଥର ମୃତ୍ୟୁ ହେଉଥାଏ

ମୋ' ନୀରିହ ଆତ୍ମାର...

କବର ଭିତରୁବି ଜୀବନ୍ୟାସ

ନେଉଥାଏ ସତ୍ତା,

ତୁମ ଅନ୍ତହୀନ କାମନାର

ମୃତ୍ୟୁ ସଂଜୀବନୀ ରେ...

କାରଣ ମୁଁ ନାରୀ !

ଗଣିକା ହେଉ କି ପ୍ରିୟା...

ପରସ୍ତ ପରସ୍ତ ଖୋଲି ଦେଉଥାଏ

ନିଜକୁ ଶରୀର ସହ

ମୋ' ତୀବ୍ର ଚେତନାକୁ ବି,

ସମର୍ପଣର ଭାବରେ,

କରୁଣାର ମୁଦ୍ରାରେ

କାରଣ ମୁଁ ନାରୀ !

ହଁ, ମୁହିଁ ଦେଇପାରେ,

ସହିପାରେ, ଜଳିପାରେ, ଢଳିପାରେ,

କେବେ ବିଧିର ବିଡ଼ମ୍ବନା ତ

କେବେ ଧର୍ମର ଦ୍ୱାହିରେ

କାରଣ ମୁଁ ନାରୀ....!