ନାରୀଟିଏ ବୋଲିତ
ନାରୀଟିଏ ବୋଲିତ
ମୁଁ ସରଳା, ଅବଳା ବୋଲିତ,ତୁମେ ସଉଦା କରିଚାଲିଛ ମୋ' ସରଳତାକୁ ପୁଞ୍ଜିକରି ବିଚ୍ ବଜାର୍ ରେ,ପ୍ରାରମ୍ଭରୁ ଏ ଯାବତ୍ ।
ମୁଁ ଭାବରେ ଭାସିଯାଏ ବୋଲିତ ତୁମେ ଅହରହ ଖେଳି ଚାଲିଛ ମୋ' ଭାବପ୍ରବଣତାକୁ ଖେଳନାକରି ।
ମୁଁ ମାନିନିଏ ବୋଲିତ, ତୁମେ ଚାପିଦିଅ ତୁମ ତିନିପାଦ ଭୂମିନେବା ବାହାନାରେ ମୋ' ସର୍ବାଙ୍ଗକୁ, ଛଳନାର ଭୂମିତଳେ ।
ମୁଁ ନହକି ଯାଏ ବୋଲିତ, ତୁମେ ମୋତେ ବାରମ୍ବାର ମୋଡ଼ି ବଙ୍କାଉ ଥାଅ,ଗଢୁଥାଅ, ଭାଙ୍ଗୁଥାଅ ନିଜ ଇଛାମତେ ତୁମ ପୌରୁଷତ୍ଵର ଦମ୍ଭରେ !
ମୁଁ କ୍ଷମାକରେ ବୋଲିତ ତୁମେ ବାରମ୍ବାର ଭୁଲ୍ କରି ଅପରାଧର ବୋଝ ଲଦୁଥାଅ ମୋ ମଥାରେ !
ମୁଁ ନଇଁପଡେ ବୋଲିତ ତୁମେ ସେଣ୍ଢାଟେକି ବାଟଚାଲ ଦୁନିଆର ରାଜ ରାସ୍ତାରେ !
ମୁଁ ସହିଯାଏ ବୋଲିତ ଏ ସଂସାର ଚକ ଗଡୁଥାଏ ନିର୍ବିବାଦରେ ।
ମୁଁ ଢାଙ୍କିଦିଏ ବୋଲିତ ତୁମେ ମୋତେ ପ୍ରତିଥର ଉଲଗ୍ନ କରୁଥାଅ ଆଢୁଆଳରେ ସଗର୍ବରେ ।
ମୁଁ ଚଳେଇ ନିଏ ବୋଲିତ ତୁମେ ଛାତିଫୁଲେଇ ଡିଣ୍ଡିମ ପିଟି ବାହାବା ନେଉଥାଅ ତୁମ ପାରିଲାପଣର ଅହଂକାରରେ ।
ମୁଁ ତୁମକୁ ଖୁସିକରେ ବୋଲିତ ନିଜ ଇଛାକୁ ଛାତିତଳେ କବର ଦେଇ ଜିଇ ଥାଉଥାଉ ନିତି ମରେ ନିଜ ଭିତରେ ।
ମୁଁ ସରେନାହିଁ ବୋଲିତ ତୁମେ ଲୁଟି ଚାଲିଥାଅ କୁବେରଭଣ୍ଡାର ଭାବି ମୋ ଶରୀରର, ହାଡ଼, ମାଂସ, ରକ୍ତ ଆଉ ନିଶ୍ୱାସ ଟିକକ ବି !
ମୁଁ ମନର ଭୋକ, ପେଟର ଭୋକ ସହିତ ଦେହର ଭୋକକୁ ବୁଝିପାରେ ବୋଲିତ ତୁମେ କେବେ ଭାବ ନାହିଁ ମୋରବି ଭୋକଟିଏ ଅଛି ବୋଲି !!
ଯାଃ.....!!!
ମୁଁ ନାରୀଟିଏ ବୋଲିତ....
ଏତେପରେବି ପୁଣିଥରେ କ୍ଷମା କରଦେଲି ତୁମକୁ ,
କାରଣ ମୁଁଯେ ଜନନୀ, ଭଗିନୀ, ଜାୟା ନାନାରୂପେ ଅବତୀର୍ଣ୍ଣା
ଈଶ୍ୱରଙ୍କ ସୃଷ୍ଟିର ଅଦ୍ଭୁତ ସର୍ଜନାଟିଏ ...!!!
Mahapatra B Sunanda.
#Bangalore.