ମନପକ୍ଷୀ

ଆକାଶେ ଉଡୁଛି ଆଜି ,ମାଟିରେ ଗଡୁଛି 

ସାଗରେ ବୁଡୁଛି କେବେ ପବନେ ଦୋଳୁଛି

ଜାଣି ମୁଁ ପାରୁନି ଆଜି ,

କେତେ ଅଛି କେତେ ମୋ' ହଜିଛି !

ବୟସର ଫୁଲ ଡାଳେ ପାଖୁଡା ନଥିବା ଫୁଲ

କାହିଁକି କେଜାଣି ଆଜି କୁଲୁରୀ ଉଠୁଛି !

ବିଳମ୍ବରେ ମଳୟ ବହିଛି ଆଜି

ବିଳମ୍ବରେ ବସନ୍ତ ଆସିଛି ,

ବିଳମ୍ବରେ ଏ ଆଖି ହସିଛି ଆଜି

ବିଳମ୍ବରେ ଏ ଓଠ କମ୍ପିଛି ,

ବିଳମ୍ବରେ ନିଜକୁ ପାଇଛି ଖୋଜି ନିଜ ପାପୁଲିରେ ।

ବିଳମ୍ବରେ ମୃତ୍ୟୁ ଫେରିଯାଏ !

ଫେରିଯାଅ ମୃତ୍ୟୁ ତୁମେ ,

ମରିବାକୁ ମୋର ବେଳ ନାହିଁ 

ବସନ୍ତ ଆସିଛି ଆଜି ଦିଗନ୍ତ ହସାଇ,

ଦିକଦିଗନ୍ତ ହସାଇ ।

କିନ୍ତୁ ହେ ବସନ୍ତ , ସତେ କ'ଣ ବାରମାସ

ମୋତେ ତୁମେ ଛାଡିଯିବ ନାହିଁ ?

ମୋ ଗଳିରେ ସତେ କ'ଣ

ବାରମାସ ମଳୟ ବହିବ ?

ମୋ ଓଠରେ ସତେ କ'ଣ

ବାରମାସ ଚମ୍ପା ମୁକୁଳିବ ?

ମୋ' ଛାତିରେ ପୁଣି କ'ଣ

ବାରମାସ ଅଭିଷେକ ହେବ ?

ସତେ କ'ଣ ବାରମାସ

ଏ ଜୀବନେ,ଏ ଆଖିରୁ

ଦୁଃଖର ପରଦା ଖୋଲିବ ?