ନାରୀ
ନାରୀ
ଏକବିଂଶ ଶତାବ୍ଦୀର ଦୁର୍ଦ୍ଦିନ ସମୟ
ସଦାସର୍ବଦା ହାହାକାର
ଗୁଣ୍ଡା ବଦମାସ ଆଉ ଲମ୍ପଟଙ୍କ ପ୍ରଳାପ
ଗ୍ରାମଠାରୁ ସହର ଯାଏ
ଲୁଚିଯାଏ କେଉଁଆଡେ
ସତ୍ୟତା ଆତ୍ମୀୟତାର ।
ଘର ଏରୁଣ୍ଡି ଡେଇଁ ଚାଲିଲେ ଦାଣ୍ଡରେ
ନରଭକ୍ଷୀ ରାକ୍ଷସଙ୍କ ଲୋଲୁପ ଦୃଷ୍ଟି ଆଉ
ଭଦ୍ରମୁଖା ନରପିଶାଚଙ୍କ ଲହ ଲହ ଜିହ୍ଵାରେ
ରାସ୍ତା ଫାଟିପଡେ ।
ନାରୀ ତୋତେ ସାଜିବାକୁ ହେବ ମହିଷାମର୍ଦ୍ଦିନୀ
ରକ୍ତମୁଖାଙ୍କ କରି ଦର୍ପଦଳନ
ଉଦ୍ଧାରିବୁ ହସ୍ତେ ଅସ୍ଥିର ମେଦିନୀ ।
ଶିକ୍ଷାଲାଭ କରି ତୁ ବାଟ ଦେଖାଇବୁ
ଆଗାମୀ ପିଢିକୁ
ଜନ ପ୍ରତିନିଧି ସାଜି ତୁ
ସଂସ୍କାରିବୁ ସମଗ୍ର ଦେଶକୁ ।
ଜନ୍ମିଛନ୍ତି ଏ ମାଟିରେ କେତେ ଯେ ନାରୀ
ଇନ୍ଦିରା,ମୀରା ଆଉ ବଛେନ୍ଦ୍ରୀ....
ଜାତ ନୁହେଁ ତୋର ଖାଲି
ସାଜିବାକୁ ଜନନୀ,ଭଗିନୀ ଜାୟା
ସାଜିବାକୁ ହେବ ତୋତେ
କଳ୍ପନା,ସାଇନା ଆଉ ସାନିଆ ।
ସୁରକ୍ଷା ଦେବୁ ତୁ ସଭିଙ୍କୁ
ହୋଇ କିରଣ
ତେବେ ଯାଇ ହେବ ନାରୀ ସଶସ୍ତ୍ରୀକରଣ
ତେବେ ଯାଇ ହେବ ନାରୀ ସଶସ୍ତ୍ରୀକରଣ ।