ନାରୀ
ନାରୀ
ମାତୃ ଶକତିର ପ୍ରତୀକ ନାରୀଟି
ନାହିଁ ଏଥିରେ ସନ୍ଦେହ
ନାରୀ ଶକ୍ତିମୟୀ ନାରୀ କୃପାମୟୀ
ସର୍ବ ଶକତିର ଗୃହ ।
ଶରଣ ବତ୍ସଳା ସର୍ବ ଦୁର୍ଗତିର
ହାରିଣୀ ଅଟଇ ନାରୀ
ସର୍ବ ମଙ୍ଗଳର ମଙ୍ଗଳକାରିଣୀ
ସଭିଙ୍କର ହିତକାରୀ ।
ନାରୀ ନାରାୟଣୀ ଜଗତ ବନ୍ଦିତା
ସାରା ଜଗତେ ବିଦିତା
ଅହଲ୍ଯା ଦ୍ରୌପଦୀ ତାରା ମନ୍ଦୋଦରୀ
କୁନ୍ତୀ ପଞ୍ଚ କନ୍ୟା ସୀତା ।
ପରମ କଲ୍ୟାଣୀ ନାରୀ ନାରାୟଣୀ
ତାଙ୍କ ସମ ହେବ କିଏ
ନାରୀ ଯୋଗମାୟା ସ୍ୱରୂପା ତାଙ୍କର
ମତି ଗତି ଜାଣେ କିଏ ।
ପ୍ରକୃତି ସ୍ବରୂପା ନାରୀ ଜଗଦ୍ଧାତ୍ରୀ
ସନ୍ତାନ ବତ୍ସଳା ସେହି
ଜଗତ ଜନନୀ ନାରୀ ସମ କହ
କିଏ ଅଛି ଆଉ କାହିଁ ।
ନାରୀ ଶକତିର ପ୍ରଗତି ପଥରେ
ଶିକ୍ଷା ହୋଇଅଛି ଠିଆ
କୀରତି ସ୍ଥାପନ୍ତି ନାରୀଗଣେ ଶୁଣି
ଉତ୍ଫୁଲ୍ଲିତ ହୁଏ ହିଆ ।
ପୁରୁବ କାଳର ଗଉରବ ଗାଥା
ଫେରାଇ ଆଣିବା ପାଇଁ
ଜାଗରିତ ହେଉ ନାରୀ ନାରାୟଣୀ
ନିଜ ଗଉରବ ନେଇ ।
ସୁନ୍ଦର ପ୍ରଭାତ ହେଉ ଉପଗତ
ସୁନ୍ଦର ହେଉ ଭାବନା
ନାରୀ ଜାଗରଣେ ହସିବ ମୋ ଦେଶ
ଦେଶ ମୋ ହୋଇବ ସୁନା ।
ଆଗାମୀ ଦିନର ପଥ ପ୍ରଦର୍ଶକ
ହେଉ ଏ ଦେଶର ନାରୀ
ସାରା ଜଗତରେ ନାମ ତାର ରହୁ
ହେଉ ସର୍ବ ହିତକାରୀ ।