ନାରୀ ନାରାୟଣୀ
ନାରୀ ନାରାୟଣୀ
ଶକ୍ତି ସ୍ୱରୂପା ବିଶ୍ଵ ରୂପା ନାରୀ ନାରାୟଣୀ
ତା ବିହୁନେ କାହିଁରେ ସୃଷ୍ଟି (ସେ) ଜନମ ଦାୟିନୀ
ସେ ଶତରୂପା ବିଶ୍ଵ ମାତା ମୋହନ ମୋହିନୀ
ସେ ଐଶ୍ୱରୀୟ ଶକ୍ତି ମତୀ ସତୀ ସିମନ୍ତିନୀ ।
ବାତ୍ସଲ୍ୟ ପ୍ରେମର ଅମୃତ ପସ୍ରବଣ ନାରୀ
ଜୀବନ ନାଟକ ମଞ୍ଚରେ ସାଥୀ ସହଚରୀ
ପ୍ରେମମୟ ମନ ମନ୍ଦିରେ ମହାଦେବୀ ନାରୀ
ଅନନ୍ୟ ପ୍ରତିଭା ସମ୍ମାନେ ପୂର୍ଣ୍ଣ ଅଧିକାରୀ ।
ନାରୀ ତ ନୁହଁଇ ଅବଳା ନୁହେଁ ସେ ଦୁର୍ବଳା
ଜୀବନର ଚଲାପଥରେ(ସେ)ଫୁଲର ପସରା
ଆକାଶ ଗଙ୍ଗୋତ୍ରୀ ସମାନ ସଦା ସେ ନିର୍ମଳ
ସେ ପୂତ ପବିତ୍ର ସଲିଳ ମନ୍ଦାକିନୀ ଧାର ।
ରାମାୟଣ ମହାଭାରତ ବେଦ କି ବେଦାନ୍ତ
ବର୍ଣ୍ଣିତ ହୋଇଛି ନାରୀର ମହାନ ଉଦନ୍ତ
ନାରୀ ପାଇଁ ପୁରୁଷର ହିଁ ପିତୃ ପରିଚୟ
ନାରୀର ବିହୁନେ ସଂସାର ହୁଅଇ ବିଲୟ ।
ଦିନର ସୂରୁଯ ଚାନ୍ଦିନୀ ଯାମିନୀ ଚନ୍ଦ୍ରମା
ଅର୍ଦ୍ଧାଙ୍ଗିନୀ,ମାତା, ଭଗିନୀ ଜୀବନ୍ତ ପ୍ରତିମା
ନିଦାଘେ ମଳୟ ମରୁତ ସୁଧନ୍ୟା ସୁକନ୍ୟା
ଅନେକ ରୂପେ ବିଦ୍ୟମାନ ନାରୀ ମହାମନା ।
ନାରୀ କାତ୍ୟାୟନୀ,କିନ୍ନରୀ କେବେ ପୌର୍ଣ୍ଣମାସୀ
ମଙ୍ଗଳ ଦାୟିନୀ ଦେବୀ ସେ କେବେ ସେ ଉଁଆସୀ
ଜୀବନ ଯୁଦ୍ଧେ ଦକ୍ଷ ଯୋଦ୍ଧ୍ରୁ କେବେ ହାରେ ନାହିଁ
ଦୁଃଖ ସୁଖ ଭରା ଜୀବନ ସୁଶୀତଳ ନଈ ।
ନାରୀରତ୍ନ ଅସାମାନ୍ୟ ସେ ଅମୂଲ୍ୟ ସମ୍ପଦ
ମଣି,ମୁକ୍ତା,ହୀରା,ବୈଡୁର୍ଯ୍ୟ ନୁହେଁ ସମକକ୍ଷ
ବିଧାତା ସୃଷ୍ଟି ରେ ଅମୃତ ଲବଣୀ ପିତୁଳା
ବହୁବିଧ ରୂପେ ବିଦିତ ଚିତ୍ର ଚାରୁକଳା ।
ନିରାଶା ଅନ୍ଧାରେ ଆଲୋକ ପ୍ରେମର ମଶାଲ
ଚେତନା ପୁଲକ ଗ୍ରନ୍ଥର ଅମୂଲ୍ୟ ଗଜଲ୍
ସଂସ୍କାର,ସୌନ୍ଦର୍ଯ୍ୟ,ଶାନ୍ତି ର ଅଭିନ୍ନ ସ୍ଵାକ୍ଷର
ଗତି,ମୁକ୍ତି,କ୍ଷମା,ଦୟାର ଅମୂଲ୍ୟ ଆଧାର ।
ସର୍ବଂସହା ଦେବୀ ଭବାନୀ ନାରୀ ନାରାୟଣୀ
କନ୍ୟା ଯୋଗମାୟା ଅଚିନ୍ତ୍ୟ (ତା)ଅଲିଭା କାହାଣୀ ।