ନାରୀ ମୋ ବୋହୁ

ଟିକେ ହସିଦେଲେ ମଧୁ ଝରିଯାଏ,

କଥାରେ ଝରଇ ସୁଧା,

ଅଳପ ଲାଜରେ ଫୁଲ ଫୁଟିଯାଏ

ଚାହାଣିତ ମନ ଲୋଭା ।

ବୋହୁ ଘରେ ଥିଲେ ତୁଳସୀ ଚଉରା

ବାସୁ ଥାଏ ମହମହ

ଖୁସିର ମଳୟ ସଦା ବହିଯାଏ

ପୁଲକିତ ଯେ ହୃଦୟ ।

ଅଗଣାରେ ଖେଳେ ସାତରଙ୍ଗୀ ରଶ୍ମି

ନୂତନ ଜୀବନ ଆସେ

ପ୍ରେମର ପୁଲକେ ପୁଲକିତ ପ୍ରାଣ

ଆଶୀର୍ବାଦ ର ହରସେ।

ଓଠ ତଳ ହସ ଲୁଚାଇ ବୁନି ତୁ

 ଝରାଇବୁ ସବୁବେଳେ,

 ନୁଆ ଦୁନିଆ ତୋ ଅପେକ୍ଷା କରିଛି

 ତୋଳି ନେବେ ଅଞ୍ଜୁଳିରେ।

 ଆଣିଛିନ୍ତି ତୋତେ ବାପା ,ମାଆ ତୋର

 ସସମ୍ମାନେ ଏହି ଘରେ,

 ଜନ୍ମ ନ ଦେଲେ ବି ଜନ୍ମଦାତା ଭଳି

 ରହିବୁ ତାଙ୍କ ପାଖରେ।

 ଜୀବନ ସାଥି ତୋ ହୀରା ଲିଳା ମୋତି

 ନ ଦେଲେ ଦେବ ଜୀବନ,

 ସୁଖ ,ଦୁଃଖ ,ହସ ,କାନ୍ଦ ସାଥେ ସାଥି ହେବ

 ସଜାଇବ ତୋର ମନ।

 ତୋର ଓଠ ତଳ ହସ ବିନିମୟେ 

 କିଣିନେବୁ ସବୁ ଘରେ,

 ନିଜ ସମ୍ପର୍କୀୟ ମାନଙ୍କ ଅଭାବ

 କେବେ ନ ଭାବିବୁ ଥରେ।

ସାତ ଜନମର ସମ୍ପର୍କ ଏ ଅଟେ

ଯୋଡିବୁ ସମ୍ପର୍କ ସେତୁ,

ମଧୁର ବଚନେ ହୃଦୟ କିଣିବ

ସୁନା ବୋହୁ ଅଟୁ ତୁ।