ନାମରସ
ନାମରସ
ହରିନାମ ପରା ସଂସାରର ପ୍ରିୟ
ହରିଙ୍କର ପ୍ରିୟ ହର
ହରିହରଙ୍କର ନାମକୁ ଜପିଲେ
ଏଭବରୁ ହେବ ପାର।।
ନାମର ସ୍ମରଣ ମୁକ୍ତିର ଭବନ
ସକଳ ପୂଣ୍ୟତା ପ୍ରାପ୍ତି
ଜପକରି ନାମ ପ୍ରଭାବେ ତରିଲେ
ପାପି ଅଜାମିଳ ବ୍ୟକ୍ତି।।
ଜପତପ ଧ୍ୟାନ ଧର୍ମ ଧାରଣାରେ
କାମନା ହୁଏ ବିନାଶ
ଏ କଳିଯୁଗରେ ନାମରସ ପାନ
କଳପ ତରୁ ସଦୃଶ।।
ସମଗ୍ର ସଂସାର ମାୟା ମୋହଭରା
ଆଳସ୍ୟ କ୍ରୋଧର ବଶ
ଛଳ କପଟରେ ମଣିଷ ର ମନ
ଆତ୍ମସୁଖେ ପରିତୋଷ।।
ଜଗତ କଲ୍ୟାଣ ହିତ ସାଧନରେ
ଭକ୍ତି ପ୍ରେମ ନାମ ମନ୍ତ୍ର
ମନର ରୂପକ ମାନସରୋବରେ
ସୁଧା ତରଙ୍ଗିଣୀ ଯନ୍ତ୍ର।।
ନିର୍ଗୁଣ ସଗୁଣ ନାମର ପ୍ରସାଦ
ଆନନ୍ଦରେ ବ୍ରହ୍ମାନନ୍ଦ
ମଙ୍ଗଳମୟ ହେ କଳୁଷ ନାଶକ
ସକଳ ଅମୃତକନ୍ଦ ।।