ମୁଠେ ସମୟ

ମୁଠେ ସମୟ ଭିତରୁ ଗୋଟେ ମୁହୁର୍ତ୍ତକୁ

ମାଗି ଆଣି ସାଇତି ରଖିଛି ତୁମରି ପାଇଁ ।

ସାରିଯାଉଥିବା ବୟସର କିଛି ଆୟୁଷକୁ

ମାଗି ଆଣି ଲୁଚେଇ ରଖିଛି ତୁମରି ପାଇଁ ।

ବିଡାଏ ଖୁସି ଭିତରୁ ଯୋଡ଼ାଏ ଭାଗକୁ

ବାନ୍ଧି ରଖିଚି ଖାସ ତୁମରି ଖୁସି ପାଇଁ ।

ସାଉଁଳିଆ ସକାଳର ସୁନେଲି ସୁରୁଜ କିରଣ ଭିତରୁ

ମେଞ୍ଚେ କଅଁଳିଆ ଖରା ସାଉଁଟିଛି ତୁମ ସ୍ୱାସ୍ଥ୍ୟ ପାଇଁ ।

ପୁଂଜେ ଜଞ୍ଜାଳମୟ ଜୀବନରୁ ଚେନାଏ 

କର୍ମ କାଠି ରଖିଛି ତୁମକୁ ଦେବା ପାଇଁ ।

ଆଞ୍ଜୁଳାଏ ଫଗୁଣ ଠାରୁ ପୁଳେ ଅବିର

ଆଣିଛି ତୁମ ଦେହରେ ବୋଳିବା ପାଇଁ ।

ପୂର୍ଣ୍ଣିମାର ଚାନ୍ଦ ଠାରୁ ତା" ଗୋଲ ଆକାରକୁ

ମାଗି ଆଣିଛି ତୁମ ମୁଖର ସୁନ୍ଦରତାର ପାଇଁ ।

ଚଗଲି ମୌସୁମୀଠୁ ଦଲକାଏ ଝଲ୍ସା ପବନ

ଆଣି ରଖିଛି ତୁମ ଓଢଣୀକୁ ଉଡେଇ ନେବା ପାଇଁ ।

ଆଞ୍ଜୁଳାଏ ଶ୍ରାବଣ ଠାରୁ ବୁନ୍ଦାଏ ବର୍ଷାପାଣି

ମାଗି ଆଣି ତୁମେ ଓଳିଏ ଭିଜିବା ପାଇଁ ପାଇଁ ।

କଲ୍ଲୋଳିନୀ ଝରଣା ଠାରୁ ମିଠା ଶବ୍ଦସବୁକୁ

ହରିନେଇଛି ତୁମ ଓଠରୁ ସଙ୍ଗୀତ ଶୁଣିବା ପାଇଁ ।

ସୁବାସିନୀ ଫୁଲଠାରୁ ମଧୁ ଯେତେସବୁ ଅଛି

ଚୋରେଇ ଆଣିଛି ତୁମର ମାଧୁର୍ଯ୍ୟତା ପାଇଁ ।