ମୁଠାଏ ଆପଣାପଣ

ମୁଠାଏ ଆପଣାପଣକୁ 

ହାତ ପାପୁଲିରେ ଧରେଇଦେଇ

ଅବ୍ୟକ୍ତ ଆବେଗ ସବୁକୁ

ଆଲିଙ୍ଗନ କରିବାକୁ କହି

ହଜିଯାଅ ତୁମେ ।

ନୂଆ ରଙ୍ଗରେ ରଙ୍ଗୀନ ମନଟା

ଅବୁଝା ହୋଇ

ଏଣେତେଣେ ଘୁରିବୁଲେ

ତୁମର ଠିକଣା ପାଇଁ

ହତାଶ ହୋଇଯାଏ 

ତଥାପି ହାରେନା ସ୍ୱପ୍ନ ।

କେବେ କଳ୍ପନାରେ କେବେ ବାସ୍ତବରେ

ଅଧିକାର ପାଇଁ 

ଅଭିମାନର ପାହାଡ଼ ଉପରେ ବସି

ପ୍ରତିଟି ମୁହୂର୍ତ୍ତରେ

ଅପେକ୍ଷା କରିଥାଏ ହୃଦୟ ।

କହିପାର ସ୍ୱାର୍ଥ 

କହିପାର ନିରର୍ଥକ 

ଦେଇପାର ଛଳନାର ନାମ

ବିଚରା ଜୀବନ

ବିଶ୍ୱାସକୁ ଏଡାଇ ପାରେନା ।

କିନ୍ତୁ

ତୁମେ 

ସତରେ ଭାରି ଅଜବ 

ଅଦୃଶ୍ୟରେ ଛୁଇଁଯାଅ ସ୍ମୃତି ହୋଇ

ଥରାଇଦିଅ ଛାତିକୁ ।

ସିକ୍ତ କରିଦିଅ ଅଭିମାନର

ତତଲା ଭାବନା ଗୁଡିକୁ 

ନିମିଷେ ପୋଛିଦିଅ

ଉଇଁଆସୁଥିବା କୋହକୁ ।

ସମର୍ପଣରେ ମହକି ଉଠେ

ଅସ୍ତିତ୍ୱ ବିହୀନ ସମ୍ପର୍କ 

ଚିମୁଟାଏ ଆଶାର ଆଲୋକରେ

ହଟିଯାଏ ଗାଢ଼ ଅନ୍ଧାର ଭିତରେ

ଅସ୍ତବ୍ୟସ୍ତ ହୋଇପଡୁଥିବା

ସମୟ ।