ମଉସୁମୀ

ପ୍ରତିକ୍ଷାର ଅନ୍ତ କରିଦିଅ ପ୍ରିୟା

ଝରିଆସ ଗଗନରୁ 

ଗ୍ରୀଷ୍ମ ପ୍ରପୀଡ଼ିତ ତପ୍ତ ଶରୀରରେ

ଶୀତଳତା ଟିକେ ଭରୁ ।

ଚାହେଁ ମଉସୁମୀ ତୁମରି ପରଶ

 ବିରହରେ ଜଳି ଜଳି

ମୋ' ହୃଦୟେ ଭରା ପ୍ରେମର କଣିକା

ପାରିବନି ତୁମେ କଳି ।

ତାପ ସନ୍ତାପିତ ମନରେ ମୋ ନିତ୍ୟ

ସିଞ୍ଚିଦେଵ ସଂଜୀବନୀ

ସୁପ୍ତ ହୃଦୟଟା ଜାଗ୍ରତ ହୋଇବ

ତୁମ ପାଦଶବ୍ଦ ଶୁଣି ।

ବରଷା ବିଜୁଳି ଇନ୍ଦ୍ରଧନୁ ତୋଳି

ଘଡଘଡି ବାଦ୍ୟ ସାଥେ

କଳାମେଘ ଘେରା ଓଢଣୀ ପକାଇ

ଫଳଫୁଲ ଧରି ହସ୍ତେ ।

ପ୍ରେମର ପୁରବୀ ଢାଳିଦେଵ ଆସି

ପ୍ରକୃତିର ବକ୍ଷପରେ

ଶ୍ୟାମଳିମା ରୂପ ଦେଖି ମୋର ନେତ୍ର

ହଜିଯିବ ପୀରତିରେ ।

ଦୁଇ ବାହୁ ମେଲି ତୁମକୁ ଛୁଇଁବି

ଭୁଲିଯିବି ସବୁ କ୍ଲାନ୍ତି

ଆସ ମଉସୁମୀ ମୋ' ମନ ମୟୂରୀ

ଢାଳିଦିଅ ତୁମ ପ୍ରୀତି ।