ମୁନା ଆଉ ବାଇଚଢ଼େଇ
ମୁନା ଆଉ ବାଇଚଢ଼େଇ
ବIଇ ଚଢେଇରେ ବାଇ ଚଢେଇ
ତୋ ମାଆ ଯାଇଛି ଆହାର ପାଇଁ
ଆଣିବ ତୋ ପାଇଁ ଗଛରୁ ତୋଳି
କଣ୍ଟେଇ, କାଆଁର, ଭଇଁଚି କୋଳି
ନାନା ଜାତି ନାଲି ପାଚିଲା ଫଳ
ଲିଚୁ, ଜାମୁ, ମିଠାପିଜୁଳି, ବର
କୁନି ଥଣ୍ଟରେ ତୁ ଖାଇବୁ ନେଇ
ଖୁସିରେ ବସାରେ ପଡ଼ିବୁ ଶୋଇ
ବାଇ ଚଢେଇରେ ବାଇ ଚଢେଇ ।1
ଉଚ୍ଚ ତାଳଗଛେ ତୋହରି ଘର
ପାଣି ପବନକୁ ନାହିଁରେ ଡର
ତୋ ବସା ଖେଳୁଛି ଆକାଶେ ଦୋଳି
ପବନ ସାଥିରେ ହୋଇଛି ମେଳି
ଦୂର ଆକାଶକୁ ତା ସାଥେ ଯିବୁ
ଜହ୍ନ ରାଇଜକୁ ଛୁଇଁ ଆସିବୁ
ପରୀରାଣୀ ଆଉ ତାରାଙ୍କ କଥା
ମୋ କାନେ କହିବୁ ସେ ସବୁ କଥା
ଶୁଣି ତୋହଠାରୁ ହରଷ ହୋଇ
ବୋଉ କୋଳେ ନିଦେ ପଡିବି ଶୋଇ
ବାଇ ଚଢେଇରେ ବାଇ ଚଢେଇ ।2
କୁନି ପକ୍ଷୀଟିଏ ବୁଦ୍ଧି ସରସା
କି କଳା କୌଶଳେ ଗଢିଛୁ ବସା
ପ୍ରକୃତି ରୁଷେନି ତୋ ଉପରେ
ନିଜ ଇଚ୍ଛା ମତେ ରହୁ ଖୁସିରେ
ମନ ହୁଏ ବ୍ୟୋମଯାନରେ ଚଢି
ତୋ ସାଥେ ବଉଦେ ଯାଆନ୍ତି ଉଡି
ଦେଖନ୍ତି ମୋ ଗାଆଁ ନଦୀ ପାହାଡ
ପଡ଼ିଆ, ଝରଣା, ଜଙ୍ଗଲ ଝାଡ଼
ଥାଆନ୍ତା କି କୁନି ଡେଣା ମୋ ଦୁଇ
ଖୁସିରେ ଉଡନ୍ତି ତୋପରି ମୁଇଁ
ବାଇ ଚଢେଇରେ ବାଇ ଚଢେଇ
ତୋ ମାଆ ଯାଇଛି ଆହାର ପାଇଁ ।3।