ମୁକ୍ତିତୀର୍ଥ

ଗର୍ବ ଅହଙ୍କାରେ ଫାଟି ପଡ଼ୁଛନ୍ତି

ଦୁର୍ଯ୍ୟୋଧନ ଦୁଃଶାସନ

ହସ୍ତୀନା କଟକ ଶ୍ରୀ ବାରୁଣାବନ୍ତ

ହେବ ପାଣ୍ଡବବିହୀନ ।

ଚଳାଉଛି ଗୋଟି କୂଟୀଳ ଶକୁନି

ସନ୍ତର୍ପଣେ ପଶାପାଲି

ହେଉ କଳ ବଳ ଅବା କଉଶଳ

ସମଗ୍ରଙ୍କୁ ଦେବ ଗିଳି ।

ତା ଆଦେଶ ବିନା ବହିପାରିବନି

ନିଃଶ୍ୱାସ ପ୍ରଶ୍ୱ।ସ ମୁକ୍ତ

ଦେବ ନାହିଁ ଛାଡି ସୂଚ୍ୟଗ୍ର ମେଦିନୀ

କରିଛି ସଙ୍କଳ୍ପ ଦୃଢ଼ ।

ହାରିବେ ପାଣ୍ଡବ ସମଗ୍ର ଜଗତ

ହେବ ସେ ରାଜାଧିରାଜ

ଯିବେ ବନବାସ ରହିବେ ଅଜ୍ଞାତେ

ପରିଚୟେ ମୃତ୍ୟୁ ଦଣ୍ଡ ।

ଲାଲ ମୁଲାୟମ ରେଶମୀ କପଡା

ସଳଖ ପଥ ପ୍ରଲମ୍ବ

ବିରାଜିବେ ବିଶ୍ଵ ମହା ଅଧିରାଜ

ସମ୍ରାଟ ମହାମହିମ ।

ଅତି ଅବାସ୍ତବ ଯେତେ ଦିବା ସ୍ୱପ୍ନ

ଘାରଇ ଡ୍ରାଗନ ନିଶା

ଗିଳିବାକୁ ମହୀ ହେଉଛି ପ୍ରସ୍ତୁତ

ବଢ଼ାଉଛି ଅସ୍ତ୍ର ସଜ୍ଜା ।

ମୁକ୍ତି ମହାତୀର୍ଥେ ଧର୍ମ କୁରୁକ୍ଷେତ୍ରେ

ଯୁଦ୍ଧ ଅଟେ ଅନିର୍ବାର୍ଯ୍ୟ

ସ୍ମରଣୀୟ ହେଉ ଗୀତା ତତ୍ତ୍ଵ ସାର

ଗଣ ପରିତ୍ରାଣ ଧାର୍ଯ୍ୟ ।

    -----