ମୁକ୍ତିର ଆନନ୍ଦ
ମୁକ୍ତିର ଆନନ୍ଦ
ତୁମେ ମୋ ଜୀବନ ତୁମେ ମୋ ସ୍ଵପନ
ତୁମେ ହୃଦର ସ୍ପନ୍ଦନ,
ତୁମେ ମୋ ମାଣିକ ତୁମେ ମୋ ବଣିକ
ତୁମେ ଭାବର ବନ୍ଧନ ॥
ତୁମେ ମୋ ନୟନ ତୁମେ ମୋ ଅଞ୍ଜନ
ତୁମେ ଗଳାର ରତନ,
ତୁମେ ମୋର ଗତି ତୁମେ ମୋର ମୁକ୍ତି
ତୁମେ ତାପ ବିନାଶନ ॥
ତୁମେ ହର୍ତ୍ତା_କର୍ତ୍ତା ଭାଗ୍ୟର ବିଧାତା
ସର୍ବ ଶକ୍ତିର ଆଧାର,
ମୁହିଁ ଦୀନହୀନ ଅତି ଦୁରୁଜନ
ଶରଣ ପଶେ ପୟର ॥
ସଂସାର ଜଞ୍ଜାଳ ଦହଇ ପ୍ରବଳ
ବିଷୟ ବାସନା ଯାଉ,
ମମତାର ମୋହ କାଢ଼ି ଦୟାମୟ
ମୁକ୍ତି ପଥଦୃଶ୍ୟ ହେଉ ॥
ତୁମେ ହିଁ ଶରଣ ତୁମେ ହିଁ କାରଣ
ଅକାରଣର କାରଣ,
ଜନ୍ମମରଣର ଗତି ମୁକ୍ତିଦାତା
ହେ ପ୍ରଭୁ ବିଶ୍ଵବନ୍ଦନ ॥
ହେ ବିଶ୍ଵକରତା ଗତି ମୁକ୍ତିଦାତା
ଏ ଅଧମେ କୃପାକର,
ମୁକ୍ତିର ଆନନ୍ଦ ଦିଅହେ ଗୋବିନ୍ଦ
ଏତେ ଅଳି ଶ୍ରୀଛାମୁର ॥