ମୁଖ ପଠନ

ମୁଁହ ପଢିବାରେ ନୁହେଁ ମୁଁ ପ୍ରବୀଣ 

ତଥାପି ପଢେ ମୁଁ ମୁଁହ 

କିଏ କେଉଁଭଳି ଲୋକ ହେଇଥିବ

ଭାବିବସେ ଦେଖି ମୁଁହ

କାହା ମୁଁହ ଦେଖି ଭାବେ ସିଏ ଗୋଟେ

ଚୋରଖଣ୍ଟ ହେଇଥିବ

ନିର୍ମାୟା ସରଳ ମୁଁହ ଦେଖି ଭାବେ

ଭଲଲୋକ ହେଇଥିବ

ଚିତା ଚଇତନ ଲମ୍ବା ଦାଢୀ ଆଉ

ଲମ୍ବ ସାଟ ପଟାବୃତ 

ଦେଖିଲେ ଭାବେ ମୁଁ ନିଶ୍ଚେ ତା ଭିତରେ

ଅଛି ବାବାଜିଆ ଭୂତ

ଆଲୁରା ବାଲୁରା କେଶ ଦାଢୀ ସବୁ

ପିନ୍ଧା ପାଇଜାମା ଧୋତି

ଦେଖି ଭାବେ କଳାକାର ହେଇଥିବ

କଳାରେ ଥିବ ତା ପ୍ରୀତି

ରାଜନୀତିଆଙ୍କ ବେଶ ଯେ ନିଆରା

ଅଲଗା ମୁଁହ ତାଙ୍କର 

ଧୋବଧାଉଳିଆ ଚହକ ଚିକ୍କଣ

କଥା ତାଙ୍କ ପାଣିଗାର

ଇସ୍ତ୍ରୀ ଭାଙ୍ଗ ପକା ଜାମାଯୋଡ ଆଉ

ଚିକ୍କଣିଆ ଦି ଚକିଆ

ବ୍ୟାଙ୍କ କିରାଣୀ ଅଧ୍ୟାପକ ଅବା

ସରକାରୀ ଚାକିରିଆ

ମୁଁହ ଦେଖି ଦେଖି ଯାହା ଭାବେ ମୁହିଁ 

ହୁଏନାହିଁ ସବୁ ସତ

ହେଲେ ମୋ ସଉକ ରହିଛି ରହିବ 

 ଥିଲାଯାଏ ମୁଁ ଜୀବିତ