ହୃଦୟ

ହୃଦୟ ଦିବସେ କାହାକୁ ହୃଦୟ

ଦେବି ବୋଲି ଆଜି ଭାବୁଛି ମୁହିଁ

ଗୋଟିଏ ବୋଲି ମୋ କୋମଳ ହୃଦୟ

କିଏ ନେବାଲାଗି ରହିଛି ଚାହିଁ।।

ଖୋଜି ଆସିଲି ମୁଁ ଦୁନିଆଁଟା ସାରା

କେହି ତ ନେବାକୁ ଚାହିଁଲେ ନାହିଁ

ସଭିଏଁ କହିଲେ ମୋର ଗୋଟେ ଅଛି

ତୁମ ହୃଦୟକୁ ରଖିବି କାହିଁ।।

ସଭିଙ୍କୁ ପଚାରି ବୁଝିପାରିଲି ମୁଁ

ହୃଦୟଟା ଆଜି ବୋଝ ସାଜିଛି

କେ କହେ ହୃଦୟ ଦେଇଦେଲା ପରେ

ଭାଙ୍ଗିବାର ଦୁଃଖ ବଳିପଡୁଛି।।

ଆଉ କିଏ କହେ ହୃଦୟଟା ବିକି

ମୂଲ ଯା ପାଇଲା କମ ଲାଗୁଛି

ଆଉ କାହାକୁ ସେ ହୃଦୟ ବିକିବ

ସେପାଇଁ ଗରାଖ ଖୋଜି ବୁଲୁଛି।।

ହୃଦୟର ଏଇ ବିକାକିଣା ଦେଖି

ହେଲାଣି ହୃଦୟେ ବହୁତ କଷ୍ଟ

ହୃଦୟଟା ମୋର ମୋ ପାଖରେ ଥାଉ

ଦେଇଦେଲେ କାଳେ ହୋଇବ ନଷ୍ଟ।।

ଗୋଟିଏ ବୋଲି ମୋ ହୃଦୟଟା ଅଛି

କିଏ ନେଲେ କାଳେ ଭାଙ୍ଗିବ ତାକୁ

ସେଥିପାଇଁ ଡର ଲାଗୁଛି ବହୁତ

ଦେବିନାହିଁ ହୃଦୟଟା କାହାକୁ।।

ହୃଦୟଟା ଦେବା ବଦଳରେ ଯଦି

ଆନ ହୃଦୟକୁ ଜିଣି ପାରିବି

ସେଥିରେ ସାର୍ଥକ ହେବ ହୃଦୟଟା

ଶାନ୍ତିରେ ଅନ୍ତତଃ ବଞ୍ଚି ପାରିବି।।