ମୋପାଇଁ ଖାଲି ଲୁହ

କେତେଦିନ ଆଉ ତୁମରି ଦୟାରେ

ବଞ୍ଚିବାକୁ ମୋତେ ହେବ

କେତେଦିନ ଆଉ ମୋ ଶୁଖିଲା ଆଖି

ନୀରବରେ ଭିଜୁଥିବ I

କେତେଦିନ ଆଉ ମୋ ବାଳୁତ ପିଲା

ତୁମଘରେ ଖଟୁଥିବ

କେତେଦିନ ଆଉ ଆମଝିଅ ବୋହୂ

ଇଜ୍ଜତକୁ ଲୁଟୁଥିବ I

ଟଙ୍କା କିଛି ପାଇଁ ବନ୍ଧା ରଖିଅଛ

ବାଳୁତ ପିଲାକୁ ମୋର

ସୁଧ ମୂଳ ଯେତେ ଶୁଝି ଚାଲିଲେ ବି

ବଢିଚାଲେ ଋଣଭାର I

ଏବେ ପୁଣି ତୁମ ଆଖିରେ ପଡିଛି

ମୋ ବଢିଲା ଝିଅ ଦେହ

ସେଥିପାଇଁ ସିନା ନିତି ନିତି ମୋତେ 

କେତେ ଚାଟୁକଥା କୁହ I

କହି ହେଉନାହିଁ ସହି ହେଉନାହିଁ

କି କରିବି ମୋତେ କୁହ

ମୋ ନିଜର ହୋଇ କିଛି ହେଲେ ନାହିଁ

ଅଛି ଖାଲି ଆଖିଲୁହ I