ମୋହିନୀ
ମୋହିନୀ
ତୁମ ବିନା ଲେଖି ପାରୁନି କବିତା
ଭାବନା ଦୀପର ସଳିତା
କାଦମ୍ବିନୀ ପ୍ରିୟା ମଧୁ ଭାଷମୟୀ
ବିଶାଖା ଗୌରୀ ଲଳିତା ll
ଭିଡିଧର ଯେବେ ମୋ ଦୁଇ ଆଖିକୁ
ହୃଦେ ସୌଦାମିନୀ ଚମକେ
ମନ ବର୍ଣ୍ଣାଳୀର ଇନ୍ଦ୍ରଧନୁ ତୋଳେ
ଲେଖନୀ କି ଅବା ଅଟକେ ll
ତନୁଶ୍ରୀ କାମିନୀ ଉର୍ବଶୀ ମାନିନୀ
ଚିତ୍ରଲେଖା ରମ୍ଭା ମେନକା
ଲାଜର ଗହଣା ହରିଣୀ ନୟନେ
ଭାବନା ମନ୍ଦିରେ ନାୟିକା ll
ରୂପ ଯୌବନ ରଙ୍ଗରେ ସଜେଇ
ଫଗୁଣେ ଫଗୁର ଅବିର
ଅଦିନେ ବସନ୍ତ ମଲ୍ଲାର ରାଗିଣୀ
କୁହୁକ ରଚଇ ହୃଦର ll
ମଧୁ ମାଳତୀର ହେନା ମଲ୍ଲୀ ବାସ
ସଜାଅ ରୂପସୀ ମାନିନୀ
ଘୁଙ୍ଗୁରର ଛନ୍ଦେ ଶୃଙ୍ଗାର ମୁଦ୍ରାରେ
ପ୍ରୀତି ଚୋରା ମନ ମୋହିନୀ ll