ମୋ ପ୍ରିୟା ଓଢ଼ଣା ତଳେ

ମୋ ପ୍ରିୟା ଓଢ଼ଣା ତଳେ

ସାତ ଦରିଆର ପ୍ରେମର ଲହର ଖେଳୁଥାଏ ଅବିରଳେ |

ମୋ ପ୍ରିୟା ଓଢ଼ଣା ତଳେ

ଶତ ଫଗୁଣର ପୀରତି ଆସର ନବରଙ୍ଗେ ପ୍ରତିଫଳେ |

ମୋ ପ୍ରିୟା ଓଢ଼ଣା ତଳେ

ସ୍ଥିର ସୌଦାମିନୀ କରେ କି ବିହାର କଳା କାଦମ୍ବିନୀ କୋଳେ |

ମୋ ପ୍ରିୟା ଓଢ଼ଣା ତଳେ

କମଳିନୀ ମୁଖ କୁମୁଦିନୀ ହସ ତନୁ ମନ ହରେ ବଳେ |

ମୋ ପ୍ରିୟା ଓଢ଼ଣା ତଳେ

ସାତ ସିନ୍ଦୁକର ମାଣିକ୍ୟ ରତନ ଥୁଆ ଅତି ଗୋପନରେ |

ମୋ ପ୍ରିୟା ଓଢ଼ଣା ତଳେ

କୁଞ୍ଚିତ କବରୀ ଜିଣି ବିଭାବରି ଶୋହେ ଚୂର୍ଣ୍ଣିଳ କୁନ୍ତଳେ |

ମୋ ପ୍ରିୟା ଓଢ଼ଣା ତଳେ

ସଭିଙ୍କୁ ଦେଖଇ କଣେଇ କଣେଇ ନିଜେ ରହି ଅନ୍ତରାଳେ |

ମୋ ପ୍ରିୟା ଓଢ଼ଣା ତଳେ

ସକଳ ମହତ ଇଜତ ରକ୍ଷିତ ରସିକେ କିମିଆ କରେ |

ମୋ ପ୍ରିୟା ଓଢ଼ଣା ତଳେ

ସତୀ ସିମନ୍ତିନୀ ସଧବା ରମଣୀ ଗୌରବ ସ୍ମାରକୀ ସ୍ଫୁରେ |

ମୋ ପ୍ରିୟା ଓଢ଼ଣା ତଳେ

ପ୍ରେମର ନିଗଡ଼ ଗଠିତ ସୁଦୃଢ ଚିରସ୍ଥାୟୀ ଇହପରେ |

ମୋ ପ୍ରିୟା ଓଢ଼ଣା ତଳେ

ସାତ ଜନମର ସପନ ସାଇତା ଅନୁବନ୍ଧିତ ପ୍ରେମରେ |

ମୋ ପ୍ରିୟା ଓଢ଼ଣା ତଳେ

ବେନି ପ୍ରାଣପକ୍ଷୀ ବସାବାନ୍ଧିଛନ୍ତି ପରସ୍ପର ବିଶ୍ୱାସରେ |