ମୋ ପେଏଁକାଳି ବଜେଇଦେ

ଉଦୁଉଦୁମା ତାଳଗୋଟମା

ଡେଙ୍ଗା ଡେଙ୍ଗା ତାଳଗଛ

ଲାଗେ ତାଳପିଠା ଭାରି ମିଠାମିଠା

କଅଁଳିଆ ତାଳସଜ ।

ଘରବାଡି ଚାଷ କଦଳୀ ପଣସ

ପିଜୁଳି କମଳା ଲେମ୍ବୁ

ଲାଗେ ଚଟପଟ କଇଁଆ ତେନ୍ତୁଳି

ବରକୋଳି କଷାଜାମୁ ।

ଦୁମୁଦୁମୁ ଖରା ଦିନ ଦିପହରେ

ପାଚିଲା ବେଲର ପଣା

ବାଡି ତରବୁଜ କଷି କାକୁଡିରେ

ଲୁଣ ଲଙ୍କା ଗୁଣ୍ଡ ମଜା ।

ସୁନ୍ଦରୀ ନାକେଇ କିସମ କିସମ

ବଡ଼ ସୁଆଦିଆ ଆମ୍ବ

ତୋଟା ଗହଳରୁ ତୋଳିଲେ ପାଚିଲା

ପାଟିରୁ ଗଡଇ ଲାଳ ।

ପାଣି ଡ଼ବଡ଼ବ ସବୁଜ ପଇଡ଼

ଅଟେ ବଡ଼ ହିତକାରୀ

ଶ୍ରୀଫଳ ନଡିଆ ସବୁଠୁ ବଢିଆ

କିଏ ତାକୁ ହେବ ସରି ।

ନଡିଆର କୋରା ଜାତିଜାତି ପିଠା

ଲାଗେ ଭାରି ସୁଆଦିଆ

ଗରମ ମୁଢିକୁ ଝାଆଲ ମସଲା

ବାଗ ବି ଖଣ୍ଡ ନଡିଆ ।

ନଡିଆ ବାଉଙ୍ଗା ଉଞ୍ଛିଲେ ପତର

ଖରିକା ମାର୍ଜନୀ କଞ୍ଚି

ନଡିଆର କତା ବଳିଲେ ଦଉଡି

ଘର ଚିଜ ଜାତିଜାତି ।

ମୋ ବାଡି ଅଗଣା ସରଗ ଦୁଆର 

ମୋ ଘର ସୋହାଗ ଶିରୀ

ଦଉଡୁଛୁ ଆମେ ଆଗକୁ ପଛକୁ

ସୁଖ ଶୁଭବେଳା ଛାଡି ।

ଆମ ପିଲାଦିନ ମାଟି କାଞ୍ଚିଖୁରୀ

ଫଳଫୁଲ ହାତୀଘୋଡା

ନଡିଆ ପତର ମୋ ପେଏଁକାଳି

ବଜେଇଦେ ଜଗାରାଜା ।