ମୋ ପାଇଁ ତୁମେ ରୂପା ଜହ୍ନ

    

ମୋ ପାଇଁ ତୁମେ ରୂପା ଜହ୍ନ

ରହି ଥିଲେ ବି ଦୂରେ ହୁଅ ପ୍ରସନ୍ନ 

ଶୁଭ୍ର ସ୍ନିଗ୍ଧ କରିଦିଅ ମୋ ମନ ଗଗନ

ଅହରହ ଆକର୍ଷି ନିଅ ମୋର ଧ୍ୟାନ

ଦିଶୁଥାଅ ତୁମେ ସ୍ଵଚ୍ଛ ପବିତ୍ର ଅମ୍ଳାନ

ତୁମ ରୂପ ଲାବଣ୍ୟରେ ହୁଏ ମୁଁ ନିମଗ୍ନ

ମୋ ପାଇଁ ତୁମେ ରୂପା ଜହ୍ନ

ତୁମ ରୂପେଲି ଜୋଛନାରେ କରାଅ ସ୍ନାନ

ମୋ ମନ ରହେ ନାହିଁ ଆଉ ମଳିନ

ଅନାବିଳ ତୁମର ଭଲ ପାଇବାର ପ୍ରୀତିଦାନ

କରିଦିଏ ମୋତେ ଭାବରେ ରଙ୍ଗୀନ

ଦେଖେ ମୁଁ ନିତି ନିତି ସ୍ଵପ୍ନ

ମୋ ପାଇଁ ତୁମେ ରୂପା ଜହ୍ନ

ପ୍ରେରଣା ଦେଇ କରୁଥାଅ ଆହ୍ଵାନ

କୁହ ଚୁପି ଚୁପି ମଧୁର ସ୍ଵର ହୁଏ ଗୁଞ୍ଜନ

ପ୍ରେରଣା ଦିଅ ଗଢ଼ିବାକୁ ସୁନ୍ଦର ଜୀବନ

ଅଗ୍ରଗତି ପଥେ କରେ ମୁଁ ଅଭିଯାନ 

ଦିଅ ପୁଣି ପରଶମଣିର ସନ୍ଧାନ

ମୋ ପାଇଁ ତୁମେ ରୂପା ଜହ୍ନ

କମନୀୟା ଲୋଭନୀୟା ସଫେଦ କିରଣ

କରାଏ ମୋତେ ଭାବ ପ୍ରବଣ

ହୃଦୟରେ ଆସେ ନବ ଜାଗରଣ

ପ୍ରେମର ପ୍ରତ୍ୟୟ ମୋ କଳ୍ପନାରେ ବୁଣ

ମୋ ସ୍ଵାଗତେ ସଜାଅ ସୁନ୍ଦର ତୋରଣ

ମୋ ପାଇଁ ତୁମେ ରୂପା ଜହ୍ନ

ତୁମ ତନୁଲତାର ରୂପଠାରୁ ବଳି ଗୁଣ

ମୋ ଆଶା ଆକାଂକ୍ଷାକୁ କର ନିମନ୍ତ୍ରଣ

ଯୋଗାଅ ଇନ୍ଧନ ଇଚ୍ଛାକୁ କରିବା ଲାଗି ପୂର୍ଣ୍ଣ

ଢ଼ାଳି ଦିଅ ସୁଗନ୍ଧିତ ଫୁଲ ଚନ୍ଦନ

ରଖିଥାଅ ତୁମ ଚିତ୍ର ଚରିତ୍ର ଜାଜ୍ଜ୍ୱଲ୍ୟମାନ 

ମୋ ପାଇଁ ତୁମେ ରୂପା ଜହ୍ନ...।।