ମୋ ଓଡିଶାର ଗର୍ବ ମୋ ଓଡିଆ ଭାଷା

ଜଗତର ନାଥ ପ୍ରଭୁ ଜଗନ୍ନାଥ

 ଉତ୍କଳ ଜାତିର ପ୍ରାଣ |

ବିଶ୍ଵ ଦରବାରେ ସମୟ ଦର୍ପଣ

 କୋଣାର୍କର ସୂର୍ଯ୍ୟ ନାରାୟଣ |୧||

ଚିଲିକାଏଅ ଶୋଭା ରମ୍ୟା ମନୋରମା

ଚାରୁ ହାସ୍ୟମୟୀ କଳିଙ୍ଗ |

ରଙ୍ଗ ବିରଙ୍ଗ ବିହଙ୍ଗେ ଶୋଭିତ

ଚାରୁ ହାୟମୟୀ ଅଙ୍ଗ ||୨||

ଆତ୍ମଚିନ୍ତନେ ଧର୍ମ ସନାତନେ

ବିଜ୍ଞ ମଗ୍ନେ ଭରା କୋଶଳ |

ଉଡ୍ରେ ଅତୀତ ତାଳପତ୍ର ପୋଥି

ପ୍ରାଚୀନ ଶିଳାଲେଖ ତୋଷଳ ||୩||

ତାରକସୀ କାର୍ଯ୍ୟେ ନିପୁଣ କଟକ

ପିପିଲିର ପଟ୍ଟଚିତ୍ର |

ବ୍ରହ୍ମପୁରୀ ପାଟ ସମଲୀ ଶାଢୀ

ପାଲା, ଦଣ୍ଡ, ଛଉ ନୃତ୍ୟ ||୪||

ହସ୍ତ କଳାପୂର୍ଣ ସ୍ଥାପତ୍ୟ ଲାବଣ୍ୟ

ସଂସ୍କୃତି ସମ୍ପନ୍ନ ଓଡିଶା |

ଜଗତେ ବିଖ୍ୟାତ ଓଡିଶିର ନୃତ୍ୟ

ସମୃଦ୍ଧ ଓଡିଶା ପ୍ରଦେଶ ||୫||

ବିଶ୍ଵ ଭାଷା କୋଷେ ସତେଇଶି ଲିପି

ଓଡିଆ ଜାତିର ଗରିମା |

ଉତ୍କଳ ସାହିତ୍ୟେ ଆତ୍ମ ବଳୀଦାନ

ସ୍ଵତନ୍ତ୍ର ଓଡିଶା -ତା’ର ଉପମା ||୬||

ଭାଷା ବିନା କାହିଁ ଜାତିର ଉନ୍ନତି

 ତତ୍ପର ଫକୀର ମୋହନ |

ଗୌରୀ ଶଙ୍କର ରାଧାନାଥ ରାୟ

ମଧୁସୂଦନଙ୍କ ଉଦ୍ବୋଧନ ||୭||

ଊନବିଂଶ ଶତାବ୍ଦୀ ଭାଷା ଆନ୍ଦୋଳନେ

ଓଡିଆଙ୍କ ପ୍ରାଣ ସ୍ପନ୍ଦନ |

ଭାଷା ସଂସ୍କୃତିର ପୁର୍ଜାଗରଣ

ସିଂହଭୂମି କିଶୋର ଚନ୍ଦ୍ରଦେବଙ୍କ ଆହ୍ଵାନ ||୮||

ଆସ, ଆସ ଭାଇ ମନ ପ୍ରାଣ ଦେଇ

 ରଖିବା ଓଡିଆ ମାନ |

କହିବା ଓଡିଆ ପଢିବା ଓଡିଆ

ରଖିବା ଓଡିଆ ମାନ ||୯||

ଜାତିର ସମ୍ମାନେ ଭାଷାର ଉତ୍ଥାନେ

 ଆଜି କରିନେବା ପ୍ରଣ |

ଓଡିଶାର କୀର୍ତ୍ତି ଐତିହ୍ୟ ଗରିମା

ରଖିବା ଉତ୍କଳ ସନ୍ତାନ ||୧୦||

ଭାବନୈତିକତା ନୀତି ଉପଦେଶ

ଔଚିତ୍ୟର ମୂଲ୍ୟବୋଧ |

ଅଚ୍ୟୁତ ଗୀତା ତୁଳାଭୀଣା, ଭାଗବତ

ମାନକଭାଷା ଏ ପବିତ୍ର ଗ୍ରନ୍ଥ ||୧୧||

ଜୟଦେବଙ୍କର ଗୀତ ଗୋବିନ୍ଦ ସେ

ବିଶ୍ଵରେ କରିଚି ଚହଳ |

ସ୍ତୁତି ଚିନ୍ତାମଣି ଭୀମଭୋଇଙ୍କର

କରିଚି ଶ୍ରୋତାଙ୍କୁ ବିହ୍ଵଳ ||୧୨||

ସଶକ୍ତ ବର୍ଣାଢ୍ୟ ଭୀମଭୋଇଙ୍କର

ଜ୍ଞାନ ବିଜ୍ଞାନ ସମ୍ମତ |

ସାରଳା ଭଞ୍ଜ ରାଧାନାଥ ସତ୍ୟବାଦୀ

ଚାରି ଯୁଗର ଉଦ୍ଭବ ||୧୩||

ଭାଷା ତ ମୋହର ଭାବ ପ୍ରକାଶକ

ଲାଳିତ୍ୟରେ ପରିପୂର୍ଣ୍ଣ |

ନୂଆ ନୂଆ ରୂପେ ସାଜି କରୁଥିବ

ବ୍ରହ୍ମଦାରୁ ଗୂଣ ଗାନ

ବ୍ରହ୍ମଦାରୁ ଗୁଣ ଗାନ ||୧୪||