ମୋ' ମାତୃଭାଷା ମୋ' ପାଇଁ ଶ୍ରେଷ୍ଠ

ମୋ' ମାତୃଭାଷା ମଧୁଠୁ ବି ମିଠା

ତୁଣ୍ଡେ ବୋଳିଲେ ଲାଗଇ

ସ୍ବର୍ଗଠାରୁ ଗରୀୟସୀ ଯେଣୁ ମାଆ

ଓଠ ପରିଭାଷା ସେଇ 

ମନୋବଳକୁ ବଢ଼ାଇ

ମୋ ଜୀବନ ସାଥେ ପ୍ରତିକ୍ଷଣ ସିଏ

ରହିଛି ସାଥୀଟେ ହୋଇ ।

ହୃଦୟରେ ତାକୁ ଭଲ ପାଇବାରେ

କେବେ ହେଳା କରିନାହିଁ

ପ୍ରତି ପଦକ୍ଷେପେ ଜୀବନ ନାବରେ

ତାକୁ ଆହୁଲା ସଜାଇ

ଚାଲୁଥିବି ମର୍ତ୍ତ୍ୟ ଭୂଇଁ

ଏହି ମୋ ଶପଥ ନିଜଠି ବିଶ୍ବାସ

ହୃଦୟ କଥା କହଇ ।

ମାତୃସ୍ଥାନୀୟା ଚିର ବନ୍ଦନୀୟା

ନମସ୍ୟା ମୋ' ଭାଷା ମାତା

ଓଠୁ ଝରୁଥିଲେ ଗରବ ମୋ ବଢେ

ସତେ କି ଜଗତ ଜିତା

ସେ ମୋ' ଭାଗବତ ଗୀତା

ସଂସ୍କାର ସଂସ୍କୃତି ସବୁ ତୋଳିଦେଇ

ବଢ଼ାଇଛି ମୋ ଅସ୍ମିତା ।

ନାନା ଭାଷା ଆସି ମୋ ଭାଷାରେ ମିଶି

କଳେବର ତା'ର ବୃଦ୍ଧି

କୋଳେଇ ନେଇଛି ପର ନମାନିଛି

ସେଥିପାଇଁ ତା' ପ୍ରସିଦ୍ଧି

ଶାସ୍ତ୍ରୀୟ ମାନ୍ୟତା ପାଇ

ଓଡ଼ିଆ ବୁକୁରେ ହରଷ ଜୁଆର

ଦେଇ ପାରିଛି ଖେଳାଇ ।

ଓଡ଼ିଆ ବୋଲି ମୁଁ ଗରବ କରୁଛି

ଭାଷାର ଗୌରବ ପାଇଁ

ଓଡ଼ିଶା ମୋ' ମାଆ ଭାଷା ବି ମୋ' ମାଆ

ଅତି ଆପଣାର ସେହି

ତାହାର ଗୌରବ ପାଇଁ

ବଳ ମୋ' ଉଦ୍ୟମ କରି ପରିଶ୍ରମ 

ଅକ୍ଷୁର୍ଣ୍ଣ ରଖିବି ମୁହିଁ ।

ମୋ' ମାତୃଭାଷା ମୋ' ପାଇଁ ଶ୍ରେଷ୍ଠ

ତା' ପରି ଜଗତେ ନାହିଁ

ଓଡ଼ିଆଙ୍କ ନାଥ ପ୍ରଭୁ ଜଗନ୍ନାଥ

ଓଡ଼ିଶା ମୋ ପୂଣ୍ୟ ଭୂଇଁ

ନେଇଛି ମୋତେ କୋଳେଇ

ଭୁଲିବିନି କେବେ ତା' ପ୍ରୀତି ମମତା

ସଦା ଓଠେ ଥିବ ରହି ।