ମୋ ହୃଦୟ ତୋ ଖେଳଘର

ହୃଦୟର ବତୀ ଜାଳିଦେଲି ପ୍ରଭୁ 

ଅନ୍ଧାର ରଖିବି ନାହିଁ

ତୋର ଆଲୋକରେ ଆଲୋକିତ ହେବି

ତୋ ଜଣାଣ ଗାଇ ଗାଇ ।।

ହୃଦୟ ମନ୍ଦିର ଖୋଲା ରଖିଥିବି

କେବେ ତୁ ଆସିବୁ ବୋଲି 

ସଜ ଫୁଲ ସବୁ ତୋଳି ରଖିଥିବି

ତୋତେ ପିନ୍ଧାଇବି ବୋଲି ।।

ହୃଦୟ କାନ୍ଦୁଛି ତୋ ପାଇଁ ଧନ 

ଟିକିଏ ଆଶିଷ ପାଇଁ

ତୋ କରୁଣା ଧନ ପାଇଗଲେ ଥରେ 

ଆଉ କିଛି ଲୋଡା ନାହିଁ।।

ହୃଦୟକୁ ସଦା ପରିସ୍କାର କରି 

ଅତର ଦେଇଛି ଛିଞ୍ଚି 

ଆସିଲେ ମୋ ଧନ ଅଶାନ୍ତି ହେବନି 

ଅଙ୍ଗୁ ଝାଳ ଦେବି ପୋଛି ।।

ହୃଦୟ ଅଶାନ୍ତ ରହିଲେ ଧନରେ 

କାର୍ଯ୍ୟେ କି ଲାଗିବ ମନ 

ଅପଥରେ ପାଦ ପଡ଼ିଯିବ କାଳେ 

କେତେ ରଖିବି ମୁଁ ଧ୍ୟାନ ?

ହୃଦୟର କଥା ହୃଦୟୀ ହିଁ ଜାଣେ 

ଆଉ କେ ଜାଣିବ କହ 

ତୋ ପରି ପ୍ରଭୁ ଥାଉଁ ଥାଉଁ ମୋର 

କାହିଁକି ମୋଡିବି ମୁହଁ !!

ହୃଦୟ ତୋହର ତୁ ହୃଦୟର 

ଯେବେଳେ ବସିବୁ ବସ 

ହୃଦୟ ଚାହିଁଛି କେତେବେଳେ ଯଦି 

ସମୟ ହୋଇବ ଶେଷ ?

ହୃଦୟକୁ ବାଧା ଦେବୁନି କହୁଛି 

ତୋତେ ହିଁ କଷ୍ଟ ଲାଗିବ 

ହୃଦୟ କନ୍ଦର ତୋର ଖେଳଘର

ଯାହା ତୋ ମନେ ଆସିବ !!!