ମୋ ଡାୟାରୀର ଶେଷ ପୃଷ୍ଠାରେ

ମୋ ଦୁଃଖର ଦରଦୀ

ମୋ ସୁଖର ସେ ସାଥି

ମୋ ବିରହ ବିରହି

ମୋ ପ୍ରେମର ପୀରତି।

କେତେ ଅନୁଭୂତି

ମାନ ପରିଚୟ

ସମାଲୋଚନା ଓ

 ଆଦର ବିଜୟ

ତୋ ସଙ୍ଗେ ବିତିଥିବା ପ୍ରତିଟି ମୁହୂର୍ତ୍ତ

ରହିଯିବ ମନ କଳାପଟାରେ

ମୋ ଡାୟାରୀର ଶେଷ ପୃଷ୍ଠାରେ।

ମୋ ସେବାର ପ୍ରେରଣା

ମୋ ସଂଘର ସେ ସାହସ

ମୋ ଏକାପଣ ସଙ୍ଗୀ

ମୋ ଲେଖାର ବିଶ୍ୱାସ।

ତୋ ଦେହେ ଆଙ୍କି

ମନର ଭାବନା

ଶବ୍ଦଶଯ୍ୟା ତୁହି

ମନର ଆଇନା।

ମୋ କବିତାର ଛନ୍ଦ ମୋ କାହାଣୀର ଶିକ୍ଷା

ସଜେଇଲୁ ମତେ ସ୍ରଷ୍ଟାରେ

ମୋ ଡାୟାରୀର ଶେଷ ପୃଷ୍ଠାରେ।