ମଣିଷ ସମୟର ଦାସ
ମଣିଷ ସମୟର ଦାସ
ସମୟର ତାଳେ ତାଳେ ଚଳଣି ବଦଳେ
ସମ୍ପର୍କ ଯେ ଭାଙ୍ଗେ ଗଢେ ମନ ବୁଦ୍ଧି ବଳେ l
ଜନ୍ମ ବେଳେ ଶିଶୁ ସଦା ସଭିଙ୍କର ପ୍ରିୟ
ହତାଦର ବୃଦ୍ଧ କାଳେ ସବୁଠି ଅପ୍ରିୟ l
ଯୌବନେ କାମନା ବାଣେ ଦିଶେ ଅନ୍ଧକାର
ଭଲ କଥା ଲାଗେ ପିତା ଚିନ୍ତା ବିରକ୍ତିର l
ଶିଶୁ ବଢ଼ି ହୁଏ ସିଏ ସୁପୁତ୍ର କାହାର
ଭାଇ,ବାପା, ମାମୁଁ, ଅଜା,ରୂପେ ଅବତାର l
ଅଭିନୟ କରୁ ସର୍ବେ ସ୍ରୋତେ ସମୟର
ପ୍ରଗତି ଦୁର୍ଗତି ହୁଏ ସାକ୍ଷୀ ଯେ କାଳର l
ଭାଷା,ଜ୍ଞାନ,ପ୍ରଥା ଆମ ଉନ୍ନତି ପଥରେ
ଆଧୁନିକ ସ୍ପର୍ଶେ ତାହା ବଦଳେ ତତ୍ପରେ l
ଯଶ କିର୍ତ୍ତୀ ସଦା ରହେ ସମାଜେ ଅମର
ସମ୍ମାନ ଦୁର୍ନାମ ମିଳେ ଫଳ ସମୟର l
ଶଗଡ଼ ରିକିସା ଟେମ୍ପୁ ରେଳଗାଡ଼ି କାର
ବିମାନ ଆଜିର ଯାନ ସ୍ଥିତି ସମୟର l
ଚିଠି ଡାକ ସେବା ଆଜି ନାହିଁ ବ୍ୟବହାର
ମୋବାଇଲି ଯୁଗ ଏବେ ଡାକ ସମୟର l
ସମୟର ଦାସ ସର୍ବେ ମନୁଷ୍ୟ ମାତର
ବଦଳେ ସମୟ ପୁଣି ବଦଳେ ନଜର l