ଭାବରେ ଭକ୍ତିରେ ଭାଗବତ

କଥା ଅମୃତ ଭାଗବତ

ଅଭ୍ୟାସ କରୁଥିବ ନିତ୍ୟ l

ସୃଷ୍ଟିର ପାଳନ ସଂହାର

କହଇ ଭାଗବତକାର l

ସଫଳ ଜନ୍ମ ଜଗତରେ

ସେବା କରମ ନର କରେ l

ମାୟା ସଂସାରେ ଭକ୍ତି ଥିଲେ

ଈଶ୍ୱର ପ୍ରାପ୍ତି ମହୀତଳେ l

କପଟ ପଥ ପରିହର

ଭାବର ତୁମେଯେ ଈଶ୍ୱର l

ପୁଣ୍ୟ ଗ୍ରନ୍ଥ ଯେ ଭାଗବତ

ନୀତି ଆଦର୍ଶ କଥାମୃତ l

ପ୍ରଭୁଙ୍କ ନାମ ଭକ୍ତିରସ

ରଚିଲେ ଜଗନ୍ନାଥ ଦାସ l

ଗ୍ରାମେ ଭାଗବତ ଆସର

ପବିତ୍ର କରଇ ସଂସାର l

ପଢିଲେ ଶୁଣିଲେ ଏ ମନ

ଆୟତ୍ତେ ରହିବଟି ଜାଣ l

ସୁଖ ଦୁଃଖରେ ଦୃଢ଼ ଚିତ୍ତ 

ବିପଦେ ଦେଉଥିବ ସାଥ l

ପ୍ରଭୁଙ୍କ ନାମ ଉପଦେଶ

ଭାଗବତେ ତାହା ପ୍ରକାଶ l

କ୍ଷଣ ଭଙ୍ଗୁର ଏ ଜୀବନ

ଅଟେ ପରା ଅଢେଇ ଦିନ l

ଦାନ ଧରମ କର୍ମ ଯାର

ସେବା ଅଟେଇ ପ୍ରଭୁଙ୍କର l

ଶ୍ରୀକୃଷ୍ଣ ଜନ୍ମ ବନ୍ଦୀଘରେ

ଦେବାକୁ ଫଳ ଅତ୍ୟାଚାରେ l

ସମ୍ପତ୍ତି ଲୋଭେ ଦୁର୍ଯ୍ୟୋଧନ

ମୃତ୍ୟୁ ଲଭିଲା ପାଇଁ ମାନ l

ଭାବ ଭକ୍ତିର ନିଦର୍ଶନ

ପ୍ରମାଣ ଦେଲେଯେ ଅର୍ଜୁନ l

ସତ୍ୟ ସରଳ ପ୍ରଭୁ ଭକ୍ତି

ଧର୍ମେ ରହିଲେ ହେବ ମୁକ୍ତି l

ଦୁର୍ଲଭ ଜନମ ମଣିଷ

ସାର୍ଥକେ ଯାଉଯେ ପ୍ରଶ୍ୱାସ l

ଚିନ୍ତା ଚେତନା କର୍ମେ ଭୟ 

ଭାଗବତ ହୁଏ ସହାୟ l

ଆନନ୍ଦେ ପଢ଼ ଭାଗବତ

ଭାବେ ହୋଇବ ସନ୍ତୋଷିତ l