ମଙ୍ଗଳମୟ ଶ୍ରୀ ଗଣପତି

ଗୌରୀ ଅଙ୍ଗ ମୌଳୀ ମାନସ ପୁତ୍ର

ମାତୃ ଭକ୍ତ ଶିରୋମଣି

ମାତାଙ୍କ ଆଜ୍ଞାରେ ଦ୍ଵାରପାଳ ଥିଲ

ହେ ବିଜ୍ଞ ଅଙ୍କୁଶ ପାଣି ।

ମାତା ଧ୍ୟାନ ଭଗ୍ନ ହେବ ନାହିଁ ବୋଲି

ଗୁମ୍ଫା ଦ୍ଵାରେ ଥିଲ ହେଳେ

ଅଜାଣତେ ତୁମେ ପିଅରେ ଲଢିଲ

ଶେଷେ ହତ ହେଲ ଛଳେ ।

ପିତା ମହାଦେବ ଦୁଃଖେ ନିୟମାଣ

ସତ୍ୟକୁ ଜାଣିବା ପରେ

ବିଷ୍ଣୁ ପରାମର୍ଶେ ହାତୀ ମୁଣ୍ଡ ଆଣି

ଜୀବଦାନ ଦେଲେ ହେଳେ ।

ଆଶୀର୍ବାଦ ଦେଇ କହିଲେ ଶଙ୍କର

ହେବ ଜ୍ଞାନ ସିଦ୍ଧିଦାତା

ଅଗ୍ରପୂଜ୍ୟ ହେବ ମାଙ୍ଗଳିକ କାର୍ଯ୍ୟେ

ସମସ୍ତେ ପାତିବେ ମଥା ।

ରିଦ୍ଧି ସିଦ୍ଧି ତୁମ ସାଥିରେ ଅଛନ୍ତି

ଅଛନ୍ତି କାର୍ତ୍ତିକ ଭାଇ

ସିଦ୍ଧି ପ୍ରଦାୟକ ମଙ୍ଗଳ ବିଭୂତି

ମାଙ୍ଗଳିକ କର୍ମେ ସ୍ଥିତି ।

ବିବାହ ବ୍ରତ ଠୁ ଯେତେ ପୂଜା ବ୍ରତ

ଅଛି ଆମ ସଂସ୍କୃତିରେ

ପ୍ରତି ଘରେ ଘରେ ମାଙ୍ଗଳିକ କାର୍ଯ୍ୟ

ତୁମ ଘଟ ଆଗେ ଭରେ ।

ମଙ୍ଗଳ ମୟ ହେ ସିନ୍ଦୁର ବଦନ

ବୁଦ୍ଧିଦାତା ଗଣପତି

ଜ୍ଞାନା ଲୋକେ ତୁମେ ଚିର ସମୁଜ୍ଜଳ

ଆହେ ଧୀର ଶାନ୍ତ ମୂର୍ତ୍ତି ।

ଆହେ ଏକ ଦନ୍ତ ପାବିତୀଙ୍କ ପୁତ୍ର

ବୁଦ୍ଧିରେ ଜିତିଛ ଭ୍ରାତା

ଦେବତା ମାନଙ୍କ ବିପଦ ହରିଛ

ଏ ମହା ବିଭୂତି ଗାଥା ।

ଆହେ ବିଦ୍ୟାଦାତା ଗଣେଶ ବିଘ୍ନେଶ

ସବୁଠି ତୁମର ପୂଜା

ଗାଁ ରୁ ସହର ଉତ୍ସବ ମୁଖର

ଚାରିଆଡେ ସାଜସଜ୍ଜା ।

ହେ ମଙ୍ଗଳ ମୂର୍ତ୍ତି ଅପୂର୍ବ ସେ କାନ୍ତି

ମୋଦକ ପ୍ରିୟ ପ୍ରବୀଣ

ମୂଷିକ ବାହନ ହର ଯେ ଦୁର୍ଗୁଣ

ମହାବିଭୂତି ରେ ପୂର୍ଣ୍ଣ ।

ତୁମେ ଜ୍ଞାନ ଦାତା ତୁମେ ସିଦ୍ଧି ଦାତା

ତୁମେ ମଙ୍ଗଳ ମୂରତି

ପିଙ୍ଗଳ ବର୍ଣ୍ଣର ଅପରୂପ ଶୋଭା

ଅପୂର୍ବ ଯେ ରୂପ କାନ୍ତି ।

ଘରୁ ଦେବାଳୟ ଉତ୍ସବ ଆଳୟ

ତୁମେ ପରା ଅଗ୍ରପୂଜ୍ୟ

ତୁମ ବିଭୂତିରେ ଅଜ୍ଞାନ ତିମିରେ

ଭରଇ ଜ୍ଞାନ ଆଲୋକ ।

ବିଦ୍ୟା ନିକତେନ ଉତ୍ସବ ମୁଖର

ବିଦ୍ୟାଦାତା ଜ୍ଞାନ ଜାତା

ତୁମରି ବିଭୂତି ବରଷି ଯାଅ ହେ

ଧରା ହେଉ ହରା ଭରା ।

ତୁମରି ପୂଜାରେ ଯୁବପ୍ରାଣ ବ୍ୟସ୍ତ

ହେଲେ ଭାବ ହଜି ଅଛି

ଆହେ ଗଣପତି କରୁଛି ମିନତି

ଦିଅ ହେ ବିଭୂତି ସିଞ୍ଚି ।

ହେ ମଙ୍ଗଳମୟ ଯୁବ ପ୍ରାଣେ ଦିଅ

ଜ୍ଞାନର ଆଲୋକ ଶିଖା

ତୁମ ବିଭୂତି ରେ ବିଭା ମୟ ହେଉ

ଯୁବକ ପ୍ରାଣ ବିଥିକା ।

ମୋଦକ ପ୍ରିୟ ହେ ମୂଷିକ ବାହନ

ଜ୍ଞାନଦାତା ସିଦ୍ଧିଦାତା

ତୁମ ବିଭୂତିରେ ଆଲୋକ ଜଗାଅ

ଆଲୋକିତ ହେଉ ଧରା ।

ହେ ମଙ୍ଗଳମୟ ଚିର କାରୁଣିକ

ଲମ୍ବୋଦର ଗଣପତି

ହେ ମଙ୍ଗଳ ମୟ ଦିଅ ହେ ଆଶିଷ

ଧରାରେ ବିରାଜୁ ଶାନ୍ତି ।