ମନ ମୋ ହଉଚି
ମନ ମୋ ହଉଚି
ଲେଖାକୁ ଫେକାକୁ ମଗଜେ ପଶୁନି
ଭାବନା ହେଉଛି ଆଡ଼
ତଥାପି ମନଟା ରାତିକ ପାହିଲେ
କବିଟେ ହୁଅନ୍ତି ବଡ଼ !
ଶବଦ ଭଣ୍ଡାର ଧାର ମୁଁ ଧରିନି
ସାହିତ୍ୟ ଜାଣିନି କିଛି
ମନ ମୋ ଉସତ ଟଙ୍କାକୁ ଦେଇକି
ପ୍ରଶଂସା କିଣିବି ବାଛି !
ମୋ ଭଳି ଲୋକଙ୍କୁ ଏକାଠି କରିବି
ବନିବି ଗୋଟାଏ ନେତା
ଲୋକଙ୍କ ଟଙ୍କାରେ ଉତ୍ସବ କରିବି
ଯୋଜନା ପାଲିଙ୍କି ଛତା !
ସଭା ମୁଁ କରିବି ଚଉକି ବସିବି
ଭାଷଣ ଛାଡ଼ିବି ବେଶୀ
ହାତରେ ପଛକେ କିଛି ମୋ ନ ହେଉ
ଜାଣିଚି ମୁରୁକି ହସି !
ପ୍ରଚାର ଭିତରେ ସାହିତ୍ୟ ବେପାର
ହାତକୁ ନେବି ମୁଁ ଏକା
ପତ୍ରିକା ବହିର ଲୋଭକୁ ଦେଖେଇ
ଲୋକଙ୍କୁ କରିବି ବୋକା !
ନିଜର ନ ଥାଉ ଲେଖା ମୋ ପଦୁଟେ
ଭଡ଼ାରେ ଲେଖାଳି ଆଣି
ଦି' ଚାରି କବିତା ଗାରେଇଦେବାରେ
ହେବି ମୁଁ ମହାନ୍ ଗୁଣୀ !