ମମତାମୟୀ ମାଆ

ମମତା ସାଗର ମନ୍ଥନୁ ଦିନେ

      ବାହାରିଲା ଯେଉଁ ଅମୃତ

ସେହି ଅମୃତର ମୂର୍ତ୍ତିମନ୍ତ ରୂପ

    ମାଆ ବୋଲି ହେଲା ବିଦିତ |

ମାତୃ ରୂପରେ ପ୍ରକୃତି ରାଣୀ 

     ସୃଷ୍ଟି କରଇ ସର୍ଜନା

ମାଆର ବାତ୍ସଲ୍ୟ ପ୍ରେମଘନ ରସେ  

     ବିଶ୍ୱର ହୁଏ ବନ୍ଦନା |

ମାଆ ସର୍ବଂସହା ବସୁମତୀ ସମ

     ସର୍ବ ପୁଷ୍ଟି ତୁଷ୍ଟି ସାଧିନୀ

ସନ୍ତାନ ପାଇଁକି ମାତୃ ସ୍ନେହଧାରା

     ଚିର ବେଗବତୀ ବାହିନୀ |

ମାତୃ ସ୍ତନ୍ୟ ଅଟେ ଅମୃତ ଭଣ୍ଡାର

    ମୃତ୍ୟୁ ସଂଜୀବନୀ ମୋଦକ

ମାଆର ପଣତ ମାଆର ଆଶିଷ

     ସବୁଠୁଁ ଅଭୟ ଦାୟକ |

ଛୋଟା କେମ୍ପା ଅନ୍ଧ ହେଉ ପଛେ ପୁଅ

     ମାଆପାଇଁ ଚନ୍ଦ୍ରଉଦିଆ 

କୋତରି ଭୁତୁରି ହୋଇଥାଉ ଝିଅ

   ମାଆର ସେ ସୁନା ଫରୁଆ |

ଜ୍ୱର ରୋଗ ହେଲେ ମାଆର ଆଖିରୁ

     ନିଦ ହୋଇଯାଏ ଅନ୍ତର

ଆକୁଳେ ମନାସେ କେତେ ଯେ ଠାକୁର

    ବିକଳେ ଦେଖାଏ ଡାକ୍ତର |

ଦଣ୍ଡେ ହେଲେ ଡେରି ବାଇଆଣୀ ପରି

     ମାଆ ଦାଣ୍ଡ ବାଡ଼ି ହୁଏଟି

ପେଟେ ଖାଇଥିଲେ କିଛି ଖାଇନାହିଁ

    ଧନ ମୋର ବୋଲି କହେଟି |

ମାଆ ପାଦଧୂଳି କୋଟି ତୀର୍ଥୂ ବଳି

    ଅଣହେଳା କର ନାହିଁଟି

ଭାରିଜା ସେନେହୀ ଯେତେ ମାତୃଦ୍ରୋହୀ

     ବାଟକୁ ଆସରେ ଲେଉଟି |