ମଳୟ ପରଶେ ବସନ୍ତ ଛିଟା

ଫଗୁଣ ଆସିଲା ମଳୟ ପରଶେ

ପଡିଲା ବସନ୍ତ ଛିଟା 

ଚୂତ ଡାଳେ ବସି ବଉଳ ଉପରେ

କୁହୁ କରେ କୋଇଲିଟା ।

ଗାଉଛି ସେ ଗୀତ ବସନ୍ତ ରାଜନ

ଆସିଲେଣି ସଜ ହୋଇ

ତୋରଣ ଲମ୍ବିଛି ବୃକ୍ଷରାଜିଙ୍କର

ନବ ପଲ୍ଲବିିତ ହୋଇ ।

ଜାଇ ଯୂଇ ମଲ୍ଲୀ ମାଧବୀ ମାଳତୀ

ଟଗର ଗୋଲାପ ଫୁଲ 

ଜାତି ଜାତି ଫୁଲ ଫୁଟି ଉଠିଛନ୍ତି

ରୂପ ତ ଅମୂଲ ମୂଲ ।

କୃଷ୍ଣଚୂଡା ହସେ ନାଲି ନାଲି ଦିଶେ

ରଜନୀଗନ୍ଧା ଧବଳ

ହଳଦିଆ ରଙ୍ଗ ଗେଣ୍ଡୁ ସୂର୍ଯ୍ୟମୁଖୀ

ରକତ ରଙ୍ଗ ମନ୍ଦାର ।

ଅପରାଜିତା ଧରିଛି କୃଷ୍ଣ ରଙ୍ଗ

ରାଧା ରୂପ ଅବା କିଏ 

କରିଛି ଧାରଣ ଅପରୂପ ରୂପ

ନବ ବସନ୍ତରେ ଇଏ ।

ଗୁଣୁ ଗୁଣୁ ହୋଇ ଭ୍ରମନ୍ତି ଭ୍ରମରେ

ଫୁଲରୁ ଫୁଲକୁ ଯାଇ 

ମଧୁକର ମଧୁ କରେ ଆହରଣ

ମଧୁଗୁଞ୍ଜନ କରଇ ।

ମୃଦୁ ମଳୟରେ ମନ ହୁଏ ତୋଷ

ଆସୁୁଛି ଦୋଳ ଯାତରା 

ରଙ୍ଗ ବୁଣିଦେବ ହୋଲି ଆସରରେ

ହସିବ ରାଇଜ ସାରା ।

ବସନ୍ତ ରାସର ହୁଏ ସମାଗମ

ଖେଳି ରଙ୍ଗ ପିଚକାରୀ 

ଆନନ୍ଦ ମଗନ ହୁଅନ୍ତି ସଭିଏଁ

ବରଷକେ ଥରେ ହୋଲି ।