ମିତଣୀ ଜବାବ

ମିତଣୀଲୋ.......

ତତେ ମୁଁ ସତରେ ପାରୁନି ଭୁଲି

ଯାହା ତୁ ପଚାରୁ ଜବାବ ଦେଲି !

ବଜାର ହାଟରେ ରଖୁନି ପାଦ

ବାତରା ଲୋକ ତ ପିଅନ୍ତି ମଦ !

ମିତଣୀଲୋ.......

ଏକାକୀ ଦେଖିଲେ ଓଢ଼ଣୀ ଟାଣି

ଦଳଙ୍କ ସାଥିରେ ଛାଡ଼ନ୍ତି ବାଣୀ !

ମାଆକି ଭଉଣୀ ନାହାନ୍ତି ତାଙ୍କ

ପାଖରେ ପାଇଲେ ସତର ରଙ୍କ !

ମିତଣୀଲୋ.......

ଭାଗ୍ୟକୁ ନିନ୍ଦିକି ଜନମ ଝିଅ

ଘରକୁ ବାହାର ଅଡୁଆ ଖିଅ !

ଲୁହରେ ଅଣ୍ଡାଳି ଆଖିକୁ ପୋଛେ

ଭଲରେ ଚଳିବା ରହୁଛି ପଛେ !

ମିତଣୀଲୋ.......

ଦୁନିଆଯାକର ଚିନ୍ତାକୁ ଜଡ଼ି

ଖଟରେ ପଡୁଛି ମୁହଁକୁ ମାଡ଼ି !

ଦେଖୁଛି ଅତୀତ ବାଳୁତ ଦିନ

ଖେଳିବା ବଢ଼ିବା ଉସତ ମନ !

ମିତଣୀଲୋ.......

ବୋଉ ମୋ ବୁଝାଏ ନାନାଦି କଥା

ତଥାପି ପାସୋର ଯାଉନି ବ୍ୟଥା !

ବାପା ବି କଦବା ଆସନ୍ତି ପାଖ

ମୁଣ୍ଡ ମୋ ସାଉଁଳି କରନ୍ତି ଦୁଃଖ !

ମିତଣୀଲୋ.......

ବଢ଼ିଲା ଝିଅର ମହତ କହି

ଶାସକ ବିରୋଧୀ ନୁହନ୍ତି କେହି !

ସିନ୍ଥିରେ ସିନ୍ଦୂର ବାଜିବ ଆଶା

ଭାବନା ଲେଖିବି ପାଉନି ଭାଷା !