ମିଛର ବଳୟ

କିଛି କୁହ ଯାହା କହିବାର ଥିଲା

କହିପାର ନାହିଁ କାହିଁ ,

କିଛି ଭାବ ଯାହା ଭାବିବାର ଥିଲା 

କେବେ କାହିଁ ଭାବନାହିଁ ।

କିଛି ଦେଖ ଯାହା ଦେଖିବାର ଅଛି

ଦେଖି ପାରୁନାହଁ କାହିଁ ,

ଟିକେ ଶୁଣ ଯାହା ଶୁଣିବାର ଅଛି 

ମଳିନତା କାହିଁ ପାଇଁ ।

ମିଛ ପ୍ରତିଶ୍ରୁତି ମିଛ ଚିତ୍ରପଟ୍ଟ

ଅନୁଭବେ ରହିଯାଏ ,

ଆବେଗ, ଭାବନା ମିଛର ବାହାନା

ଅଭିନୟ କହିଦିଏ ।

ମିଛ ଆତ୍ମିୟତା ମିଛ ପ୍ରତିଛବି

ନିଃଶ୍ୱାସକୁ ରୁନ୍ଧି ଦିଏ ,

ନିଜ ଚାରିପାଖେ ମିଛ ବଳୟରେ

ବିଶ୍ଵାସ ଦୋହଲି ଯାଏ ।

ସତ୍ୟ ବିଶ୍ଵାସର ଶବ୍ଦାୟିତ ଧ୍ଵନୀ 

ନିରବରେ ଭାଙ୍ଗିଯାଏ ,

ନିଜ ଡାଏରୀର ହାତ ଲେଖା ଶଦ୍ଦ

ନିଃଶବ୍ଦରେ ରହିଯାଏ ।

ଅନେକ ଆଶାର ମିଛ ଆଶ୍ୱାସନା

ହୃଦୟକୁ ଭାଙ୍ଗିଦିଏ ,

କହିବା , ଭାବିବା , ଦେଖିବା , ଶୁଣିବା

ସବୁ ଶେଷ ହୋଇଯାଏ ।