ମିଛ ଅପବାଦ ଦେଇ ଜାଣ ଖାଲି କଥାକୁ ଗରମ ନିଆଁ

ମିଛ ଅପବାଦ ଦେଇ ଜାଣ ଖାଲି

କଥାକୁ ଗରମ ନିଆଁ

ନରମ ଓଠର ପ୍ରିୟାକୁ ସତରେ

ପରକୁ ବାଛିଛ ନାଆଁ

..........ମିଛ ଅପବାଦ ଦେଇ ଜାଣ ଖାଲି

           କଥାକୁ ଗରମ ନିଆଁ । ୦ ।

ଫୁଗଣ ଫୁଲକୁ ଶ୍ରାବଣ ଦେଖେଇ

ଏମିତି କରୁଛ ଘୃଣା

ଭାବର ଲାଭକୁ ପାସୋରି ଦେଇଛ

ନିଜକୁ ହେଉଛ ବଣା,

ବିଗତ ଦିନର ନାୟିକା ହଜିନି

ଛାଡ଼ିଛ ମଉନ ଗାଆଁ

..........ମିଛ ଅପବାଦ ଦେଇ ଜାଣ ଖାଲି

           କଥାକୁ ଗରମ ନିଆଁ । ୧ ।

ଆଶା ଅଭିସାର ଚଳେଇ ଜାଣନି

ବକଟେ ସାଜୁଛ ପିଲା

ପ୍ରେମର ହାଟରେ ନିରୀହ ସଉଦା

ବଢ଼ିଆ କରୁଛ ପାଲା,

ସପନ ଆଖିକୁ ରଗଡ଼ି ଦେଇଛ

ସବୁକୁ ଦିଶୁଛି ଧୂଆଁ

..........ମିଛ ଅପବାଦ ଦେଇ ଜାଣ ଖାଲି

           କଥାକୁ ଗରମ ନିଆଁ । ୨ ।

ମାୟା ମୋହ ଖେଳ ଖେଳିବା ଆଗରୁ

ବୁଝିନ ସରାଗ ମନ

ପୁଣ୍ୟରୁ ପାପକୁ ଓଟାରି ଆଣୁଛ

ବିଚାର ଦେଉଛ ହୀନ,

ବିରହ ଛାଡ଼ିକି ପାଖକୁ ଆସ ହେ

ଧରା ମୁଁ ଚୁମ୍ବନ ଛୁଆଁ

..........ମିଛ ଅପବାଦ ଦେଇ ଜାଣ ଖାଲି

           କଥାକୁ ଗରମ ନିଆଁ । ୩ ।