ମହାପ୍ରଭୁଙ୍କର ବାଙ୍କଚୂଡ ବେଶ
ମହାପ୍ରଭୁଙ୍କର ବାଙ୍କଚୂଡ ବେଶ
କାର୍ତ୍ତିକ ମାସର ଶୁକ୍ଳ ପକ୍ଷର
ଦ୍ୱାଦଶୀ ତିଥି ଆସିଲା
ମହାପ୍ରଭୁଙ୍କର ବାଙ୍କଚୂଡ ବେଶ
ଆଜି ଏ ଦିନରେ ହେଲା ।
ପ୍ରଭାତର ଅବକାଶ ସରିଗଲା
ଯେବେ ମହାପ୍ରଭୁଙ୍କର
ଜଗନ୍ନାଥ ବଳଭଦ୍ର ଦୁଇ ଭାଇ
ଏ ବେଶ ହେଲେ ସତ୍ୱର ।
ଦୁଇ ଭାଇଙ୍କର ମସ୍ତକେ ଚନ୍ଦ୍ରିକା
ଚୂଳ ପାଉଛନ୍ତି ଶୋଭା
ଦକ୍ଷିଣ ଦିଗକୁ ଖୋସା ପଡିଅଛି
ଦିଶେ କେଡେ ମନଲୋଭା ।
ଖୋସା ଅଗ୍ରଭାଗେ ସୁବର୍ଣ୍ଣର କିଆ
ରହିଅଛି ଖଞ୍ଜା ହୋଇ
ଭକତ ଜନଙ୍କ ମନ ମୋହୁଛନ୍ତି
ଏ ବେଶରେ ବେନି ଭାଇ ।
ସୋଲ ଜରି ଜମ୍ବୁରା କଇଥ ଅଠା
ଲାଗି ହୋଇଛି ଏ ଚୂଳ
ସୁବର୍ଣ୍ଣ ଶ୍ରୀଭୂଜ ଶ୍ରୀପୟର ଲାଗି
ହୋଇଛନ୍ତି ଆଦିମୂଳ ।
ମହଣ ମହଣ ସୁନାରେ ଶୋହନ୍ତି
ଦେଖ ଏ ବେନି ଭାଇଙ୍କୁ
ଶ୍ରୀଭୂଜରେ ଶଙ୍ଖ ଚକ୍ର ଜଗନ୍ନାଥ
ହଳ ମୂଷଳ ବଳୀଙ୍କୁ ।
ବାମନ ସ୍ୱରୂପ ଗେଡା ଦିଶୁଛନ୍ତି
ଭକତ ବାନ୍ଧବ ଦେଖ
ନୂଆ ନୂଆ ବେଶ ଧରି ଦେଖା ଦେଇ
ହରନ୍ତି ଦୁଃଖୀଙ୍କ ଦୁଃଖ ।
ଦ୍ୱାପର ଯୁଗରେ ଗୋପିଙ୍କୁ ମୋହିଲେ
ଯେ ରୂପେ ବାଙ୍କ ଚୂଳିଆ
ତ୍ରିଭଙ୍ଗୀ ଠାଣିରେ ଆଜି ସେହି ରୂପେ
ଦେଖ ହୋଇଛନ୍ତି ଠିଆ ।
ବାଳଧୂପ ଶେଷ ହେବା ଯାଏଁ ସିନା
ରହିବ ପ୍ରଭୁଙ୍କ ବେଶ
ମନ ମୀନ ମୋର ତବ ପଦ୍ମପାଦେ
ରଖ ପ୍ରଭୁ ପୀତବାସ ।