ମହାପର୍ବ

ଆସୁଛି ଆଗକୁ ଫଗୁଣ ପୁନେଇଁ

ରଙ୍ଗର ପରବ ହୋରି

ନାଚିବା ଗାଇବା ଖେଳିବା ଅବିର

ରଙ୍ଗ ପିଚକାରୀ ମାରି ।

ନାଲିଆ ନେଳିଆ ହଳଦୀ ଶାଗୁଆ

କଳାଧଳା ବାଇଗଣି

ହେବା ଏକାକାର ବୋଳିହୋଇ ରଙ୍ଗ

ଭିନ୍ନତା ହେବନି ଜାଣି ।

ମିଳନର ପର୍ବ ବସନ୍ତ ଉତ୍ସବ

ଆନନ୍ଦ ଉଲ୍ଲାସ ମନ

ଭୁଲି ଭେଦଭାବ ପର ଆପଣାର

ସର୍ବେ ଏକମନ ପ୍ରାଣ ।

ମାଆ ଧରଣୀର ସନ୍ତାନ ସରବେ

ସଭିଏଁ ଭଉଣୀ ଭାଇ

ହେବା ଆଗୁସାର ହାତେ ରଖି ହାତ

ମୁହଁ ରେ ହସ ଫୁଟାଇ ।

ଶାନ୍ତି ମୈତ୍ରୀ ପ୍ରୀତି ସହ ଅବସ୍ଥାନ

ପ୍ରଗତିର ମୂଳମନ୍ତ୍ର

ମହାନ ବାରତା ଦିଏ ମହାଶିକ୍ଷା

ମିଳନର ମହାପର୍ବ ।

  ---------