ମଧୁମୟ ମଧୁମାସ

ଅପୂର୍ବ ଆନନ୍ଦେ ମନ ପୁଲକିତ

ବରଷିଲା ରଙ୍ଗ ବର୍ଷା

ମଧୁମାସ ଏଇ ଫଗୁଣ ପାର୍ବଣେ

ଲିଭି ଯାଏ ଦ୍ୱେଷ ଈର୍ଷା ।

ଇନ୍ଦ୍ରଧନୁ ରଙ୍ଗ ବିଛାଇଛି ସତେ

ଆଜି ଏଇ ଧରା ଧାମେ

ଶ୍ରାବଣର ରୂପେ ବସନ୍ତ ବର୍ଷାଏ

ମନ ମୋହି ସ୍ନେହ ପ୍ରେମେ ।

ଶୀତର ରାଜୁତି ଲୁଚି ଗଲା କାହିଁ

ପ୍ରବେଶିଲା ଋତୁରାଜ

ହସୁଛି ମେଦିନୀ ମନ ତା ରଙ୍ଗିନ୍

ପଞ୍ଚ ମୁରୁଜରେ ସଜ ।

ହୃଦୟ ଶୁଷ୍କତା ଲିଭାଏ ବସନ୍ତ

ସବୁଜ ପାଲଟେ ମରୁ

ନବ ପଲ୍ଲବିତେ ତରୁ ଲତା ହସେ

ପ୍ରକାଶି ସୁନ୍ଦର ଚାରୁ ।

ଏଇ ତ ଜୀବନ ଅନେକ ସପନ

ଏଇଠି ମଳୟ ବହେ

ଏଇ ହୃଦୟକୁ ସ୍ନେହ ପ୍ରୀତି ଦେଇ

କେତେ ଯେ ରାଗିଣୀ ଗାଏ  ।