ମାଟି ଘର
ମାଟି ଘର
ମାଟି ଘର ମୋର ଆହା ! କି ସୁନ୍ଦର
ଏହା ତ ପ୍ରଭୁଙ୍କ ଦୟା
ତା ସାଙ୍ଗରେ ଦେହ ଗଢ଼ିଛନ୍ତି ପରା
ମାଟି ଲିପା ମୋର କାୟା ।
ସେହି ଘର ମୋର ମନ୍ଦିର ସମାନ
ସୁଖ ଶାନ୍ତି ଭରପୁର
ଫଳ ଫୁଲ ପୁଷ୍ପେ ଯାହା ମିଳେ ମୋତେ
ଭାବେ ପ୍ରଭୁ ଉପହାର ।
କଥା କୁହା ମୋର କାଳିଆ ଠାକୁର
ହୃଦୟ କନ୍ଦରେ ବସି
ସତ୍ୟ ପଥେ ନେଇ ଏ ରଥ ଚଳଇ
ଭରି ଦେଇଛନ୍ତି ଖୁସି ।
ମନେ ରଙ୍ଗ ମାଟି ବୋଳି ଦେଇଛନ୍ତି
ମୋର ଏ ସୌଭାଗ୍ୟ ଦେହେ
ଝୋଟି ଚିତା ଦେଇ ନିତି ଛବି ଆଙ୍କେ
ନପଡ଼ି ମାୟାର ମୋହେ ।
ଅଶେଷ କରୁଣା ବରଷାଇ ଦେଇ
ସଂସାର ରଖିଲେ ସ୍ଥିତି
ତାଙ୍କ ଶ୍ରୀଚରଣେ ଢାଳୁଛି ପ୍ରଣତି
ଦୁଃଖ ମୋର ହେଉ ଇତି ।