ମାତୃଭାଷା

ଭାବ ପ୍ରକାଶର ପ୍ରକୃଷ୍ଟ ମାଧ୍ୟମ ଭାଷା ବୋଲି ତାକୁ କହି

ଭାଷାରୁ ଉତ୍ପତି ମାନବ ସଭ୍ୟତା ଭାଷା ଚିରସ୍ରୋତା ନଈ |

ମାଆର ଭାଷା ତ ମାତୃଭାଷା ଯାହା ଦୁନିଆରେ ଶ୍ରେଷ୍ଠତମ

ମାତୃଭୂମି ମାତୃଭାଷାର ମମତା ସର୍ବମାନ୍ୟ ସର୍ବୋତ୍ତମ |

ବହୁବିଧ ଭାଷା ବହୁ ଉପଭାଷା କଥିତ ଅବା ଲିଖିତ

ଲିପି ବିବର୍ଜିତ ଅନେକ ଭାଷା ତ ହୋଇ ଗଲାଣି ବିଲୁପ୍ତ |

ଯା ଭାଷା ଦୁର୍ବଳ ସିଏ ହୀନବଳ ନାହିଁ ତାର ସ୍ୱାଭିମାନ

ପରପୁଚ୍ଛ ଧରି ଗୋଲାମୀ ଆଦରି ହୋଇଥାଏ ହୀନିମାନ |

ଭାଷା ବିଭୂଷିତ ସାହିତ୍ୟ ଉନ୍ନତ ସଭ୍ୟତାର ମାପକାଠି

ସାହିତ୍ୟ ସାଧନ ଶିକ୍ଷା ସଂସାଧନ ପ୍ରଗତିର ପରିପାଟୀ |

ରାଜରାଣୀ ଭାଷା ଓଡ଼ିଆ ସରସା ସଂସ୍କୃତ ସମ ଉନ୍ନତ

ପ୍ରାଚୀନତା ପାଇଁ ଷଷ୍ଠ ଭାଷା ରୂପେ ଜାତୀୟ ସ୍ତରେ ସ୍ୱୀକୃତ |

ଓଡ଼ିଆ ଲିପିର ଭାଷା କୋଷାଗାର ସାଗର ସମ ବିଶାଳ

ହିନ୍ଦୀ ଇଂରାଜୀର ପରିସରଠାରୁ ବହୁଗୁଣେ ବୃହତ୍ତର |

ମାତାକୁ ନଚିହ୍ନି ବିମାତାରେ ଆଜି ବଢ଼ିଯାଇଛି ଆଦର

ସାହିତ୍ୟରେ ମାଡ଼ିଯାଏ ଧଳା ଛଉ କଦାକାର କଳେବର |

ମୋ ଭାଷା ଓଡ଼ିଆ ସବୁଠୁଁ ବଢ଼ିଆ ଅମୃତର ରସାୟନ 

ସାରଳା ଉପେନ୍ଦ୍ର ରାଧାନାଥ ଯୁଗ ସାରସ୍ୱତ ମହୀୟାନ |

ବିଶୁଦ୍ଧ ଓଡ଼ିଆ ଲିଖନେ ପଠନେ ଜାଗରେ ଓଡ଼ିଆ ଆଜି

ବଢ଼ୁ ଜାତି ପ୍ରୀତି ଜାତୀୟ ସଂହତି ଫେରୁ ହୃତ କୀର୍ତ୍ତିରାଜି |