ମାଣବସା ଗୁରୁବାର

ଆଜି ଶୁଭଦିନ ମାର୍ଗଶୀର ମାସ

ମାଣବସା ଗୁରୁବାର

ବିଜେ ହେବେ ଲକ୍ଷ୍ମୀ ମାଆ ସାଆନ୍ତାଣୀ

ପୁରେ ପୁରେ ଘର ଘର ।

ରାତି ନ ପାହୁଣୁ ଶୁଚିମନ୍ତ ହୋଇ

ସୁଗୃହିଣୀ ନାକେଦମ

ଅରୁଆ ଚିତୋଉ ଝୋଟି ଚିତା କାଟି

ଆଙ୍କିଛନ୍ତି ପାଦ ପଦ୍ମ ।

ପୀତାମ୍ବରୀ ଦେଇ ସବୁ ସରଞ୍ଜାମ

ମାଜି କରିଛନ୍ତି ସଫା

ଖଟୁଲି ଉପରେ ଲକ୍ଷ୍ମୀଙ୍କ ପ୍ରତିମା

ଶେରମାଣ ଯତ୍ନେ ରଖା ।

ନୂଆ ଧାନ ସିଞ୍ଚା ବରକୋଳି ପତ୍ର

ଅଅଁଳା ଦୂବ ଅକ୍ଷତ

ପୂଜା ଅର୍ଘ ଥାଳୀ ଭୋଗ ନୈବେଦ୍ୟ

ହୋଇଅଛି ସୁପ୍ରସ୍ତୁତ ।

ସିନ୍ଦୂର କୁଙ୍କୁମ କଜ୍ଜ୍ୱଳ ଅଳତା

ଅଳଙ୍କାର ପାଟବସ୍ତ୍ର

ପିନ୍ଧାଇବ ଯତ୍ନେ ସ୍ନାହାନ ଶେଷରେ

ଅକ୍ଷତେ ଭରିବେ ମାଣ ।

ମାତାଙ୍କ ପ୍ରତିମା ଶୁଦ୍ଧ ପଞ୍ଚମୃତେ

ମନ୍ତ୍ରେ କରିବେ ସ୍ନାହାନ

ପ୍ରଦୀପ ଜଳାଇ ହୁଳହୁଳି ଦେଇ

ମାତାଙ୍କର ଆବାହନ ।

ନାଲି ହଳଦିଆ ବ୍ରତ ଉପଚାରେ

ପଡିବ ଦଶଟି ଗଣ୍ଠି

ମାତାଙ୍କ ନାମକୁ କରି ଉଚ୍ଚାରଣ

ବାହୁରେ ବାନ୍ଧିବେ ଭିଡି ।

ଷୋଡଶୋପଚାର ପୂଜା ଅରଚନା

ନଇବେଦ୍ୟ ଧୂପଦୀପ

ମାତାଙ୍କ ସମୀପେ ଦାସ ବଳରାମ

ଗୀତିଗାଥା ଭକ୍ତିପାଠ ।

କେଉଁ କେଉଁ କର୍ମ କର୍ତ୍ତବ୍ୟ କରିଲେ

ମିଳିଥାଏ ଶୁଭାଶୀଷ

ସହଜ ସୁନ୍ଦର ହୋଇଛି ବର୍ଣ୍ଣିତ

ଆଚାର ଦିବ୍ୟ ସନ୍ଦେଶ ।

ଜାତି ବର୍ଣ୍ଣ କୁଳ ସର୍ବ ନିର୍ବିଶେଷେ

ମନଦେଇ ସୁଗୃହିଣୀ

ନିଷ୍ଠାପର ଭାବେ ମାଣପୂଜା କରି

ହୋଇଥାନ୍ତି ସୈ।ଭାଗିନୀ ।

ମାତା ଅନ୍ନପୂର୍ଣ୍ଣା ସଦା ବରପ୍ରଦା

ସୃଷ୍ଟି ପାଳନକାରିଣୀ

ଲଭୁ ଶୁଭାଶୀଷ ବଇଭବ ସୁଖ

ସୀମନ୍ତିନୀ ସୁଗୃହିଣୀ ।

 -----