ମାଣବସା ଗୁରୁବାର

ଆଜି ମାଣବସା ଗୁରୁବାର

           ମାସ ମାର୍ଗଶିର

ଘରେଘରେ ସର୍ବତ୍ର ପୂଜା ହୁଏ

         ଦେବୀ ଲକ୍ଷ୍ମୀଙ୍କର ।

ପାହାନ୍ତି ପହରୁ ଉଠି ପଡି

         ଝୋଟି ଚିତା ଦେଇ

ସମସ୍ତ ଗୃହିଣୀ ଲାଗି ପଡନ୍ତି

           ପୂଜାର୍ଚ୍ଚନା ପାଇଁ ।

ଶଙ୍ଖ ହୁଳହୁଳି ଧ୍ୱନିରେ

            କମ୍ପେ ଚତୁର୍ଦ୍ଦିଗ

ମହାଲକ୍ଷ୍ମୀଙ୍କ ପାଖରେ ଲାଗେ

         କେତେ ଭୋଗ-ରାଗ ।

  

ଭୁଆସୁଣୀଙ୍କ ଭିଡ଼ ଜମେ

            ଚଉରା ମୂଳରେ

ଗୃହ ପାଲଟିଥାଏ ଦେବାଳୟ

          ଲକ୍ଷ୍ମୀ ଆଳତିରେ ।

ମାଣବସା ଗୁରୁବାର ମାହାତ୍ମ୍ୟ

           ଶ୍ରୀୟାକୁ ବି ଜଣା

ଲକ୍ଷ୍ମୀପାଦ ପଡ଼ିଥିଲା ତା' ଗୃହେ

          ସେ ମା'ଙ୍କ କରୁଣା ।

ମହାଲକ୍ଷ୍ମୀ ସନ୍ତୁଷ୍ଟ ହୋଇଲେ

           ସୁଖ ଆସେ ଘରେ

ପୁତ୍ର କନ୍ୟା ଧନ ରତ୍ନ ମିଳଇ

           ମା' ଆଶୀର୍ବାଦରେ ।

ମାଣବସା ଗୁରୁବାର ପାଳେ ଯେ

             ନିଷ୍ଠା ସହକାରେ

ମହାଲକ୍ଷ୍ମୀ କୃପା କରନ୍ତି ତାକୁ

             ପରମ ଶ୍ରଦ୍ଧାରେ ।