ମାଁ ମୋର ଆଶା ଭରଷା

     

ମା , ମାଆ ମମତାର ମୂର୍ତ୍ତୀମନ୍ତ ରୂପ,

                    ଅମୂଲ ମୂଲ ତା ପ୍ରେମ।

     ମାଆ ର ଭାଷା ମୋ,ସବୁଠୁ ମଧୁର,

                    ଗୀତା ଭାଗବତ ସମ।୧।

ଆ , ଆଶା ଭରସାର,ଏକଇ ଉତ୍ସ ସେ

                    ସେ ମୋ ସାକାର ବ୍ରହ୍ମ।

        ଆଣିଛି ଧରାରେ ,ଗର୍ଭେ ଧରି ମତେ

                    ଦେଇଛି ଦୁର୍ଲଭ ଜନ୍ମ।୨।

ମୋ , ମୋହରି ପାଇଁ ସେ, ଦଶମାସ କାଳ

                ସହିଛି,ଗର୍ଭ ଯନ୍ତ୍ରଣା।

        ମୋହରି ପାଇଁ ସେ, ଅନିଦ୍ରା ରହିଛି

            ନ ସହି ମୋର କାନ୍ଦଣା।୩।

ର  ,  ରକତ ମାଉଁସ,  ଶରୀରୁ ତାହାର

            ଝାରି ଅମୃତର ରସ।

        ରହି ଉପବାସେ, ମୋ ପେଟ ସକାଶେ

            ଖଟେ ରଜନୀ ଦିବସ।୪।

ଆ   , ଆପଣା ଜୀବନ, ଯୌବନ ଅଜାଡି

              ସଜାଡିଛି ମତେ ନିତି।

          ଆଖି ଅଢୁଆଳେ,ରଖିଛି ସେ ମତେ

                  ଦେବାପାଇଁ ଆତ୍ମଶାନ୍ତି ।୫।

ଶା  ,  ଶାସନ ନୂହେଁ ତ,ଅନୁଶାସନରେ

                ସଂସ୍କାର ଦେଇଛି ମତେ

          ଶାରିରୀକ ଆଉ,ମାନସିକ ରୂପେ

                 ସୁଦୃଢ କରିଛି ସତେ।୬।

ଭ  ,  ଭକତି ପଥରେ, ପଥିକ କରି ସେ

                 ଖୋଲିଛି ମୋ ଅନ୍ତର୍ଚକ୍ଷୁ।

          ଭଲ ମନ୍ଦ ଜ୍ଞାନ, ତାହାରି ତ ଦାନ

                ଯେସନ ସେ ବୌଦ୍ଧଭୀକ୍ଷୁ।୭।

ର   , ରସାରେ ଶ୍ରେଷ୍ଠ ତ ,ଏ ମାତୃ ଜଗତ

                  ତରେ,ତାରେ ଭବବାରି।

             ରହିଥିବା ଯାଏ, ଏ ପିଣ୍ଡେ ପରାଣ

                   ସେବା କରିବି ତାହାରି।୮।

ସା  ,    ସାଧୁସଙ୍ଗତରେ, ରହି ନିରନ୍ତରେ

                    ଗାଉଥିବି ମାତୃଗୁଣ।

            ସାରସ୍ବତ ହେବ, ମୁରାରୀ  ସାଧନା 

                  କର୍ମଯୋଗୀ ବୀରପଣ।୯।