ଦେଖାଅ ନିଜର ଦମ୍ଭ
ଦେଖାଅ ନିଜର ଦମ୍ଭ
ଅବଳା ଶବ୍ଦରେ ନିହିତ ରହିଛି
ଅସୀମ ଅମାପ ଶକ୍ତି,
ସବଳା ନାରୀ ସେ ଜନ୍ମଦାତ୍ରୀ ପୁଣି
ଅନ୍ତ ରୂପେ ଦିଏ ମୁକ୍ତି ।
ଜନନୀ ଘରଣୀ ଭଗିନୀ ପ୍ରଭୃତି
ଅନେକ ମାଧ୍ୟମ ଧରି,
ପୁରୁଷ ଜୀବନ କରେ ଆଲୋକିତ
ସୁଖ ସ୍ବାଚ୍ଛନ୍ଦ୍ୟରେ ଭରି ।
ଅତ୍ୟାଚାର ଭୋଗେ ନାରୀଟିଏ ଆଜି
ଘରୋଇ ହିଂସାରେ ପରା,
ଗଣ ବଳାତ୍କାର କନ୍ୟାଭ୍ରୁଣ ହତ୍ୟା
ଦୋହଲାଇ ଦିଏ ଧରା ।
ସମୟ ଚକ୍ରରେ ନିଜ ଅସ୍ତିତ୍ୱକୁ
ପାସୋରି ଯାଇଛି ସେହି,
କାତ୍ୟାୟନୀ ମାତା ମହିଷାମର୍ଦ୍ଦିନୀ
ସମୃଦ୍ଧ ତ୍ରିଗୁଣମୟୀ ।
ପୁରାଣ ବର୍ଣ୍ଣିତ କଥାଟିଏ ଅଛି
ଶକ୍ତି ବିନା ଶିବ ଶବ,
ଉଠାଇ ଖର୍ପର ସର୍ବ ନାରୀକୁଳ
ଦେଖାଅ ନିଜର ଦମ୍ଭ ।